QYZYLORDA. 27 sáýir. Qazaq handyǵynyń 550 jyldyǵyna arnalǵan qazaq kúresinen Qyzylorda oblystyq «Altyn belbeý» týrnıri máresine jetti. Bul týraly egemen.kz tilshisi habarlady.
«Altyn belbeý» jarysy aıdan astam ýaqytqa sozyldy. Boz kilemdegi balýandar úsh kezeń boıynsha tórt jas deńgeıinde synǵa tústi. Eldi mekenderden bastalǵan bıylǵy jarystyń aýdandyq, qalalyq, oblystyq irikteý týrlaryna barlyǵy 7 152 sportshy qatysty. Jarystyń úshinshi kezeńi – sheshýshi synǵa Baıqońyr jáne Qyzylorda qalalary men aýdandardan 256 palýan qatysty.
Eń kishi jas ereksheligi boıynsha Qyzylorda qalasynyń sportshylary jaqsy qyrynan kórindi. Al jasóspirimder arasynda Qarmaqshy, Shıeli, Jańaqorǵan aýdandary, jastardan Qyzylorda qalasynyń sportshylary ózderiniń myqtylyqtaryn baıqatty. Eresekter arasynda Qarmaqshy aýdanynan kelgen palýandar da birneshe júldege qol jetkizdi.
Túıe palýan saıysyna 22 sportshy qatysty. Olardyń arasynda Araldyń palýany Nurym Sálimgereev «Syr barysy» atandy. Oǵan «Altyn belbeý» beldigi men 1 mln. 200 myń teńgeniń sertıfıkaty tabystaldy. «Syr arlany» ataǵyn ıemdengen Rýslan Ábdirazaqovqa (Jalaǵash aýd.) 700 myń teńgeniń sertıfıkaty berilse, «Syr suńqary» – Aıbek Serikbaevqa 300 myń teńge kóleminde syıaqy tabystaldy.
Sondaı-aq, ár jas erekshelikteri boıynsha 1, 2 jáne 3-oryndardy ıelengen sportshylar alǵys hattarmen marapattalyp, olarǵa da qarjylaı syılyqtar berildi.
Osy saıys qorytyndysy boıynsha 5 shilde kúni Astana qalasynda Qazaqstan Prezıdentiniń júldesi úshin ótetin «Qazaqstan barysy» respýblıkalyq týrnırine Qyzylorda oblysynan Nurym Sálimgereev pen Rýslan Ábdirazaqov qatysatyn boldy.
Erjan Baıtiles.
Derek, sýret: egemen.kz.