ASTANA. 26 qańtar. Ispanııanyń Granada jáne Slovakııanyń Shtrbske-Pleso men Osrble qalalarynda ótip jatqan HHVII qysqy Ýnıversıada oıyndarynda elimiz eki altyn medalmen birinshi kúnnen jalpykomandalyq esepte alǵa shyqty. Bul týraly egemen.kz habarlady.
Alǵashqy kúni saıystyń 4 túrinen jeńimpaz anyqtaldy. Sonyń ekeýi bizdiń otandasymyz. Jarysty jeńispen bastaǵan sportshylarymyz – shańǵymen sprınterlik tartysta top jarǵan Anastasııa Slonova (joǵarydaǵy sýrette) men bıatlonnan 15 shaqyrymdyq jekeleı synda aldyna jan salmaǵan Alına Raıkova (tómendegi sýrette).
Qorjynǵa túsken alǵashqy altyn medaldiń ıegeri Anastasııa. Shtrebske-Plesonyń jarys jolynda el namysyn qorǵaǵan ol fınaldyq syndy 3 mınýt 22,75 sekýndta júrip ótti. Qazaqstandyq shańǵyshy shırek jáne jartylaı fınaldyq básekelerde máre syzyǵyn ekinshi bolyp qıǵan edi. Sondyqtan bolar, sheshýshi básekede bas júldeden úmitti reseılik Svetlana Nıkolaeva bizdiń qyzdan asa qaýip kúte qoımady. Esesine, ol polshalyq Evelına Marsıshti aldyna jibermeýge tyrysty. Jarys bastalǵan sátten-aq ekeýi alǵa sýyrylyp shyqty. Sońǵy aralyqqa deıin Slonova sol qos sportshynyń ókshelerin basyp keldi. Tek márege 100 metrdeı qalǵan kezde Anastasııa ekpinin kúsheıtip, eki sportshyny da basyp ozdy. Nátıjesinde, altyn medal bizdiń qorjynǵa tússe, kúmis júlde Evelınanyń (+0,18 sek.) enshisinde ketti. Al reseılikke buıyrǵany qola medal ǵana. Ol bizdiń sportshydan 0,42 sekýndqa qalyp qoıdy.
Osy altyn medaldiń qýanyshy basylmaı jatyp Osrbleden taǵy bir jaǵymdy jańalyq jetti. Bıatlonshy qyzymyz Alına Raıkova áıelder arasyndaǵy 15 shaqyrymdyq saıysty 47 mınýt 29,4 sekýndta júrip ótip, Ýnıversıada chempıony atandy. Jarys barysynda bıatlonshylar tórt márte nysana kózdegen bolatyn. Alına barlyq oqtyń bireýin ǵana múlt jiberdi. Al reseılik Ekaterına Avvakýmova barlyq nysanany dál kózdegenimen, shańǵymen jarys kezinde bizdiń sportshydan 9 sekýndqa qalyp qoıyp, kúmis medaldi qanaǵat tutty. Qola júlde slovakııalyq Paýlına Fıalkovanyń enshisine jazyldy. Ol márege chempıonnan 41,7 sekýndqa keshigip jetti. Taǵy bir otandasymyz Galına Vıshnevskaıa bul joly jarysty tórtinshi orynmen aıaqtady (+56,9). Sondaı-aq, qalǵan qazaqstandyqtardyń kórsetkishteri mynadaı: Darıa Ýsanova 9-oryn (+3:38,7), Anastasııa Kondrateva 29-oryn (8:02,6), Galına Mıkrıýkova 36-oryn (+9:51,9).
Alǵashqy jarys kúniniń qorytyndysy boıynsha jalpykomandalyq esepte Qazaqstan 2 altyn medalmen kósh bastady. Qorjynynda 1 altyn, 3 kúmis jáne 3 qola júldesi bar Reseı 2-satyǵa nyq senimmen jaıǵasty. Úzdik úshtikti jalǵyz altynmen Ýkraına túıindep tur. Bir kúmis medali bar Polsha 4-orynda tursa, jalqy qola júldeni qorjyndaryna salǵan Slovakııa 5-tuǵyrǵa ornalasty. Ázirge medal oljalaǵan elder osy beseýi ǵana.
Jarys týraly aıtar bolsaq, bıylǵy dodada álemniń 43 elinen kelgen 1550 sportshy saıystyń 11 túrinen baq synaýda. 14 aqpanǵa deıin sozylatyn jarys barysynda 69 medal jıyntyǵy sarapqa salynbaq. Aıta keter jaıt, atalmysh dodany áý basta jalǵyz Granada ótkizetin bolyp sheshilgen. Degenmen, ótken jyldyń maýsymynda Ýnıversıtettik sport túrleriniń halyqaralyq federasııasy (FISU) qojaıyn memlekettiń qataryna Slovakııany qosty. Naqty aıtsaq, atalmysh eldegi qysqy sport túrleriniń ortalyǵy sanalatyn Shtrbske-Pleso men Osrble qalalary da 2015 jylǵy qysqy Ýnıversıada astanasy bolyp tanyldy. FISU mundaı sheshimdi qarjy máselesine baılanysty qabyldady. Alaıda, Slovakııada sporttyń 4 túrinen ǵana, ıaǵnı, shańǵymen jarys, tuǵyrdan sekirý, bıatlon jáne qossaıys boıynsha jarystar ótedi. Qalǵan hokkeı, mánerlep syrǵanaý, short-trek, kerlıng, snoýbord, frıstaıl jáne taý shańǵysy boıynsha medaldar Ispanııa jerinde taratylmaq. Degenmen, Granadadaǵy jarystar 1 aqpanda ǵana bastalatynyn eskersek, ázirge basty nazar Slovakııaǵa aýyp tur.
Elaman Qońyr.
Derek: egemen.kz.
Sýret: tatry2015.sk.