Atalǵan joba sheńberinde Almaty qalasynda aqparattyq-túsindirý toptarynyń múshelerine arnalǵan oqytý semınarlary jáne trenıngter iske asyryldy, dep habarlaıdy Egemen.kz.
Osy aıdyń 26-27 kúnderi Almaty qalasynyń Nur-Múbarak Egıpet ıslam mádenıeti ýnıversıtetinde Mádenıet jáne aqparat mınıstrliginiń Din isteri komıtetiniń qoldaýymen «Rýhanı jańǵyrý» qoǵamdyq qorynyń uıymdastyrýymen din máseleri boıynsha bilikti mamandardy daıyndaýǵa baǵyttalǵan is-shara ótti. Sharaǵa «Din zertteý ortalyǵynyń», meshitterdiń, orta jáne joǵary oqý oryndarynyń jáne t.b mamandary, ımamdary, psıhologtary men teologtary qatysty. Jıynda túsindirý tobynyń músheleri – Neırolıngvıstıkalyq baǵdarlamalaý mamany, psıholog Seıtqalı Mırzada Shahmanuly jáne dintaný mamany Taldybaev Tólegen О́mirzaquly dárister oqydy.
Seıtqalı Mırzada Shahmanuly «Oratorskoe masterstvo: Iskýsstvo pýblıchnyh vystýplenıı» taqyrybynda sóıleý tehnıkasynyń meńgerýdiń tıimdi joldaryn atap ótip, durys tynys alýdy, únniń qulaqqa jaǵymdy, sózdiń, býynnyń ashyq, aıqyn bolýyna septigin tıgizetin tásildermen bólisti. Sondaı-aq, «Navykı vysokoeffektıvnyh lıýdeı» taqyrybynda jalpy teorııalyq aqparat berip, qatysýshylarmen jumys jasady.
Taldybaev Tólegen О́mirzaquly «Áleýmettik jelide túsindirý jumystaryn júrgizýdiń mańyzdylyǵy» taqyrybymen qatysýshylarǵa qazirgi ǵalamtor arqyly jas órkenniń boıyna tárbıelik máni zor dúnıelerdi sińire bilý múmkindigin qamtamasyz etý, qazirgi ýaqytta jamaǵatpen baılanysty áleýmettik jeli arqyly ornatýdyń mańyzdylyǵy túsindirildi. Sondaı-aq, «Áleýmettik jeliniń algorıtmderin meńgerý jáne tıimdi túsindirý jumystaryn júrgizý», taqyrybynda qatysýshylarǵa áleýmettik jelide jergilikti paraqshany júrgizý ádisterin úıretti.
Sonymen qatar semınarlar men trenıngter barysynda dáriskerlerge qatysýshylar suraqtar qoıyp, tushymdy jaýaptar aldy.