TALDYQORǴAN. 27 sáýir. Taldyqorǵanda «Elbasymen birge – jańa jeńisterge» atty jeńimpazdar forýmy bolyp ótti. Bul týraly egemen.kz tilshisi habarlady.
Ony Almaty oblysynyń ákimi Amandyq Batalov ashyp: «Memleket basshysynyń sarabdal saıasatymen júrgen elimiz barlyq qıyndyqty jeńip, jańa jetistikterge jetip, kúnnen-kúnge turmysy jaqsaryp, beıbit ómir súrýde. Prezıdenttik saılaý – halqymyzdyń birligin nyǵaıtyp, elimizdegi saıası turaqtylyqty bekite tústi. Elbasy saılaý aldynda kindik qany tamǵan Jetisýǵa kelip, jergilikti halyqtyń ystyq yqylasyna bólengen edi. Halyq óz tańdaýyn jasady», – dedi.
Sonymen qatar, óńir basshysy: «Almaty oblysynyń saılaýshylary Tuńǵysh Prezıdentimiz Nursultan Ábishulyn biraýyzdan qoldap, úlken belsendilikpen daýys berdi. Barsha qazaqstandyqtar sekildi jetisýlyqtar da durys tańdaý jasady. Jerlesteri Elbasyn naqty is júzinde qoldap, respýblıkamyzda birinshi orynǵa ıe boldy. Bul – óz ulyna degen týǵan jerdiń syıy, tileýi ekeni anyq! Bizdiń aldymyzda zor mindetter tur. Onyń eń bastysy – Qazaqstandy álemniń damyǵan 30 eliniń qataryna qosý. Bul asýdy biz Prezıdentimizben birge alatynymyzǵa senimdimin», – dedi.
Kelesi kezekte, ashyq aspan astyna qurylǵan sahna tórine eńbek ardagerleri, demokratııalyq partııa men Qazaqstan halqy assambleıasynyń ókilderi, stýdent jastar jáne sportshylar shyǵyp júrekjardy tilekterin bildirdi. Merekelik shara konserttik baǵdarlamamen jalǵasty.
Nurbol Áldibaev.
Derek, sýret: egemen.kz.