Senat Tóraǵasy Máýlen Áshimbaev búgin V Dúnıejúzilik kóshpeliler oıyndary aıasynda etnoaýylda ótken jamby atý saıysynyń fınaldyq kezeńine arnaıy baryp, qazaq sportshylaryna qoldaý bildirdi, dep habarlaıdy Egemen.kz.
Palata Spıkeri óz sózinde Dúnıejúzilik kóshpeliler oıyndary ulttyq sportty jáne tarıhı murany dáripteýde aıryqsha mánge ıe ekenin atap ótti.
«Kóshpeliler oıyndary – ulttyq sport túrlerin jáne kóshpeli halyqtardyń tarıhı murasyn dáripteıtin biregeı bastama. Sondyqtan Prezıdentimiz Qasym-Jomart Kemeluly Toqaev Kóshpeliler olımpıadasy dep ataǵan osyndaı aýqymdy is-sharany ótkizý elimizdi tanytyp, tarıhymyzdy nasıhattaý turǵysynan asa mańyzdy. Bul jobany osydan on jyl buryn qyrǵyz aǵaıyndarymyz alǵash ret uıymdastyrǵan edi. Sodan beri kóshpeliler oıyndary ıgi dástúrge aınaldy. Bıyl qazaq elinde ótip jatqan oıyndar uıymdastyrý deńgeıi, qatysýshy elderdiń sany jáne saıys aıasyndaǵy mádenı baǵdarlamalardyń aýqymy jaǵynan erekshe ekeni sózsiz», dedi Máýlen Áshimbaev.
Uıymdastyrýshylardyń aıtýynsha, kóshpeliler oıyndarynda sportshylar jamby atýdyń tórt túri boıynsha synǵa túsip jatyr. Naqty aıtqanda, olar koreıa, túrik, majar jáne qazaq stıli boıynsha baq synaıdy Atalǵan sport túrinen 27 elden kelgen 78 mergen chempıondyq ataqty sarapqa salady.
Aıta keteıik, jarystyń birinshi kúni 8 qyrkúıek kúni ótti. Alǵashqy altyn jáne qola medaldardy Fransııa ulttyq quramasynyń sportshylary jeńip aldy. Al «kúmis» Mońǵolııa atletine buıyrdy. Atalǵan synda qazaq sportshysy Abzal Tulybekov alǵashqy bestikke iligip, úzdikter qatarynan kórindi.
Jalpy, V Dúnıejúzilik kóshpeliler oıyndaryna álemniń 89 elinen kelgen 2 800 sportshy qatysyp jatyr. Joba qolǵa alynǵaly beri ótken on jylda alǵash ret barlyq qurlyqtan qatysýshy keldi. Olardyń arasynda eń shalǵaıda ornalasqany Avstralııa quramasy ekenin atap ótken jón. Oıyndar aıasynda ǵylymı baǵdarlama ótkizý de kózdelgen. Oǵan 12 elden 75 maman qatysady dep josparlanyp otyr.