Jetisýda sport salasyna arnalǵan keshender kóptep salynyp jatyr. Ásirese alystaǵy aýyl balalary arnalǵan jańa ǵımarattardyń qurylysy qarqyndy. Máselen, byltyr 4 blokty-modýldi sport kesheni salynsa, bıyl taǵy 6 nysan turǵyzý josparlanǵan. Jaqynda oblys týrızminiń tamyryna qan júgirtken monoqala Tekelide dene shynyqtyrý-saýyqtyrý kesheni ashyldy.
Jetisý oblysynda buqaralyq sportty damytýǵa, sonyń ishinde shalǵaı aýdandar men aýyldarda erekshe kóńil bólingen. Qazirgi kezde eldi mekenderde 6 dene shynyqtyrý-saýyqtyrý kesheni bolsa, 31 myńnan astam halqy bar Tekeli qalasynda ashylǵan taǵy bir jańa keshen jurtshylyqty qýantty. El qýanyshyna ortaqtasqan oblys ákimi Beıbit Isabaev Tekelidegi keshenniń ashylýyna qatysyp, óńirde sport salasyna jasalyp otyrǵan jaǵdaılarǵa qysqasha toqtaldy.
«Tekelide zamanaýı jańa dene shynyqtyrý-saýyqtyrý keshenin ashyp otyrmyz. Mundaı keshen oblys ortalyǵy Taldyqorǵannyń ózinde joq. Jalpy, Jetisý oblysy qurylǵaly beri óńirde 14 sport nysany salynyp, el ıgiligine usynyldy. Áleýmettik salanyń ınfraqurylymyn damytýda blokty-modýldi konstrýksııalar keńinen qoldanylýda. Osy oń tájirıbeni biz ótken jyldan beri sport salasynda da paıdalana bastadyq. Máselen, byltyr aýyldyq jerlerde 4 blokty-modýldi sport kesheni salynsa, bıyl taǵy altaýynyń qurylysyna qarjy bólindi. Osyndaı jańa nysandar Qaratal aýdanynyń Tastóbe aýylynda, Eskeldi aýdanynyń Shymyr, Jetisý, Eltaı, Kerbulaq aýdanynyń Qyzyljar, Alakól aýdanynyń Qarabulaq aýyldarynda boı kóteredi. Mundaı sporttyq nysandardan halyqaralyq jarystarda bıik shyńdardy baǵyndyratyn myqty sportshylar shyǵady dep senemin», dedi B.Isabaev.
Saltanatty is-shara barysynda sport ardagerleri Turatbek Charapıev, Ertaı Dúısebaev, Atlanta olımpıadasynyń júldegeri Máýlen Mamyrov bastaǵan zııalylar jańa sport kesheniniń lentasyn saltanatty túrde qıdy. Endi bul sport nysanynda qalanyń Olımpıadalyq rezervtegi mamandandyrylǵan balalar men jasóspirimder sport mektebiniń tárbıelenýshileri jattyǵady.
«Tekeli qalasynda Olımpıadalyq rezervtegi mamandandyrylǵan balalar men jasóspirimder sport mektebi jumys isteıdi. Munda 495 balany 24 jattyqtyrýshy 7 sport túrinen jattyqtyrady. Jańa sport kesheni ashylýynyń arqasynda sportpen aınalysatyn balalar sanyn 800-ge deıin ulǵaıtýǵa múmkindik bar. Qosymsha seksııalar – áıelder kúresi, erkin jáne grek-rım kúresteri, ústel tennısi úıirmelerin ashýdy josparlap otyrmyz, oǵan qajetti 8 jattyqtyrýshy jumysqa qabyldanady. Munda qala halqynyń da buqaralyq sport túrlerimen aınalysýyna múmkindik jasalǵan», deıdi Tekeli qalalyq dene shynyqtyrý-saýyqtyrý kesheniniń dırektory Dıdar О́telbaev.
Kórki kóz súısintetin eki qabatty jańa sport kesheni 180 orynǵa arnalǵan. Munda qajetti sporttyq quraldarmen jabdyqtalǵan boks, kúres, jattyǵý jáne oıyn zaldary, sonymen birge júgirý joly bar ashyq stadıon, balalar oıyn alańy men vorkaýt-alańdar bar.
«Týǵan jerdiń bir jýsany gúldese qýanatyn eljandylyq sezim bar boıymyzda. Al týǵan óńiriń órkendep, záýlim úıler, zamanaýı keshender salynyp jatsa qalaısha qýanbaısyń? Tekeli turǵyny retinde men de osynaý qýanyshty oqıǵanyń kýágeri bolyp otyrmyn. Rızamyn. Endi osynaý dene shynyqtyrý-saýyqtyrý kesheninen, jańa oblys ákimi quttyqtaý sózinde aıtqandaı, Máýlen Mamyrov, Nurbaqyt Teńizbaev, Demeý Jadyraev sekildi balýandarymyz, chempıondarymyz ósip shyqsyn», deıdi monoqala turǵyny Baǵlan Temiruly.
Saltanatty ashylý rásiminen soń kópshilik oblys ákimimen birge oıyn men jattyǵý zaldaryn, boks zalyn aralap, ǵımarattyń ishki jaǵdaıymen tanysty. Beıbit Isabaev jas sportshylarmen áńgimelesip, jasóspirimderge dop jáne basqa da sporttyq jabdyqtar syılady.
Oblys ákimi baspasóz qyzmetiniń málimetinshe, oblys boıynsha qazirgi kezde 6 dene shynyqtyrý-saýyqtyrý kesheni qoldanysta. Oǵan qosa Panfılov aýdanynyń Úsharal jáne Sarqan aýdanynyń Almaly aýyldaryndaǵy sport keshenderdiń qurylys-montajdaý jumystary júrgizilip jatyr. Taldyqorǵan qalasynda «Jetisý» kásibı voleıbol klýbyna arnalǵan oqý-jattyǵý bazasy, jeke ınvestorlar esebinen klýb voleıbolshylaryna arnalǵan 40 oryndy jataqhana, sondaı-aq, Ústel tennısi ortalyǵy salynýda. Taldyqorǵan ortalyq alańyna jańǵyrtý jumystary jasaldy. «Qazaqstan halqyna» qoǵamdyq qorynyń demeýshiligimen Panfılov aýdany Kóktal jáne Aqsý aýdany Qapal aýyldarynda angar tıptes 2 sporttyq nysan boı kóterýde. Búginde oblysta 280 myńǵa jýyq adam nemese oblys halqynyń 40% sportpen shuǵyldanady.
Jalpy, óńirde sport salasynyń ınfraqurylymyn damytý baǵytynda ásirese aýyldyq jerlerde blokty-modýldi konstrýksııalar keńinen paıdalanylyp keledi. Buǵan deıin medısınalyq jáne veterınarııalyq pýnktterdi, sondaı-aq mádenıet obektilerin salý kezinde qoldanylyp júrgen blokty-modýldi konstrýksııalardy paıdalanýdyń oń tájirıbesi ótken jyldan bastap sport salasyna da engizildi. Máselen, Sport kúnine oraı Qaratal Tastóbe aýylynda jańa blokty-modýldi sport kesheni ashylsa, osyndaı nysandar Kerbulaq aýdanynyń Qyzyljar, Alakól aýdanynyń Qarabulaq aýyldarynda jáne Eskeldi aýdanyndaǵy Shymyr, Jetisý, Eltaı aýyldarynda salynyp jatyr.
Eskeldi aýdanynyń ishki saıasat, mádenıet, tilderdi damytý jáne sport bóliminiń basshysy Ashat Orazalınovtiń aıtýynsha, búginde aýdanda 4 sport nysany jumys isteıdi. Olarda balalar men jasóspirimder sport mektebiniń 1 200-ge jýyq tárbıelenýshisi sportpen aınalysady. Al jańa blokty-modýldi sport keshenderiniń salynýy halyqty buqaralyq sportqa kóptep tartýǵa múmkindik týdyryp otyr.
Eskeldi aýdanyndaǵy eki qabatty jańa blokty-modýldi sport keshenderiniń birinshi qabatynda mını-fýtbol, voleıbol, basketbol sııaqty komandalyq oıyndarǵa arnalǵan zaldar ornalassa, ekinshi qabatynda boks, kúres jáne basqa da sport túrlerine arnalǵan zaldar qarastyrylady. Sonymen qatar sport zaldary, dýsh bólmeleri, kıim aýystyratyn bólmeler jáne basqa da qajetti oryndar jobalanǵan. Ǵımarattardyń árqaısysynyń aýdany 720 sh.m., oıyn zaldarynyń alańy – 500 sh.m.
Jalpy, oblysta osy jylǵa josparlanǵan 6 sport nysanynyń 1-eýi qoldanysqa berildi, qalǵan beseýiniń qurylysy jyl sońyna deıin aıaqtalyp, iske qosylady dep mejelenip otyr.
Jetisý oblysy