Kúreńbel jerinde qos birdeı qýanyshty oqıǵa boldy. Áýeli Kerbulaq aýdanynyń Sarybulaq aýyldyq okrýgine qarasty Qaraǵash aýylynda – 5, Jolaman aýylynda 4 otbasyna baspana kilti tabystaldy. Sonymen qatar Jolaman aýylynda demeýshilerdiń kómegimen salynǵan jańa balabaqsha qoldanysqa berildi. Talaı jyldan beri saryla kútken nysandardyń el ıgiligine aınalǵanyna kópshilik dán rıza.
Aldymen Sarybulaq aýyldyq okrýginiń Qaraǵash aýylyna bardyq. Munda baspanaly bolý baqytyna aýdandaǵy jaǵdaıy tómen, jalǵyzilikti, kópbalaly, múmkindigi shekteýli, turǵyn úı kezeginde turǵan 5 otbasy qol jetkizdi. Qýanyshqa jınalǵan qaýym aldynda júrekjardy tilegin bildirgen aýdan ákimi Qanat Esbolatov turǵyn úımen qamtamasyz etý halyqtyń ómir súrý sapasyn kóterýdegi eń basty máseleniń biri ekenin aıtty.
«2023-2029 jyldar aralyǵynda turǵyn úı-kommýnaldyq ınfraqurylymdy damytý tujyrymdamasy» boıynsha salynǵan úıler el ıgiligine berildi. Aýdandaǵy ár aýyldyq okrýgterde úı kezeginde turǵan turǵyndarǵa 8-9 úıden salyp jatyrmyz. Jalpy jyl sońyna deıin 100 úı beriledi dep josparlanyp otyr. Odan bólek, aýdan ortalyǵynda 60 páterli úı salyndy. Onyń kilti qyrkúıek aıynyń 12-juldyzynda beriledi. Sol kúni 250 oryndyq emhananyń ashylýy ótedi. Baspanaly bolǵan turǵyndardy qonystarymen quttyqtaımyz», dedi Q.Esbolatov.
О́z kezeginde turǵyn úıdiń sapaly jáne ýaqtyly berilýine úles qosqan merdiger «Kazstroy Building» JShS quryltaıshysy Baýyrjan Oralǵazın halyqtyń batasyn alý úshin úıdi sapaly ári ýaqtyly aıaqtaǵanyn aıtyp, qonys ıelerine aqjarma tilegin bildirdi. Osydan keıin aqjaýlyqty ájeler shashý shashyp, Sarybulaq aýyldyq aqsaqaldar alqasynyń tóraǵasy Qajymuqan Esimbekov aq batasyn berdi.
Kópten kútken úıdi ıelengen jandardyń qýanyshynda shek joq. Qonysqa ıe bolǵan jaqyndaryn quttyqtap shashý shashyp, tilek aıtýshylar qatary da az bolmady. Kóp jyldan beri baspanasyz, týǵan-týysyn panalap kelgen Yrysjan Jumadilova jańa qonys ıesi atandy. II-toptaǵy múmkindigi shekteýli jan páter kiltin alǵanda qýanyshyn jasyra almady.
«Amalsyz anamnyń, týǵan-týystarymnyń úıinde turyp keldim. II-toptaǵy múgedektiktiń saldarynan óz betimshe jumys jasap, baspana alýǵa múlde múmkindik bolmady. Oblys ákiminiń, aýdan basshylyǵynyń arqasynda úıli boldyq. Mundaı jaqsylyqtyń sharapatyn qınalyp júrgen árbir otbasy kórse dep tileımin. Qolushyn sozyp, kómektesken jandarǵa alǵysymdy bildiremin», dedi ol.
Jolaman aýylynda «2023-2029 jyldar aralyǵynda turǵyn úı-kommýnaldyq ınfraqurylymdy damytý tujyrymdamasy» boıynsha salynǵan 4 úıdiń kilti tabystaldy. Munda da páter kiltine ıe bolǵandar negizinen uzaq jyldan beri turǵyn úı kezeginde turǵan kópbalaly jáne turmysynda qıynshylyǵy bar jalǵyzbasty analar men múmkindigi shekteýli jandar.
Turǵyn úı kezegindegi azamattar úshin berilgen eki aýyldaǵy úıdi ınvestorlar óz qarjylaryna salǵan. Jergilikti ákimdik pen qurylysqa jaýapty «Kazstroy Building» jáne «ÝnıversalStroıServıs» JShS arasynda «Turǵyn úı salý, satyp alý» memorandýmy jasalypty. Iаǵnı kásipker óz qarjysyna salǵan úıdiń sapasyn ákimdik tekserip, bir sharshy metrin 294 200 teńgeden satyp alady. Sonda bir úıdiń quny 22 mln 652 myń teńgege aınalady.
Memorandýmǵa sáıkes, kásipkerler Kerbulaq aýdanynyń 17 eldi mekeninde 100 turǵyn úı qurylysyn júrgizedi. Qazirgi tańda 17 úıdiń qurylysy aıaqtalypty. Búgin 9 úıdiń kilti tabystaldy. Jospar boıynsha qazan aıynda 50, qarasha aıynda 33 úıdiń qurylysy aıaqtalady. 3 bólmeli úı 77 sharshy metrdi quraıdy. Aýmaǵy – 10 sotyq. Zaman talabyna saı salynǵan baspanada aýyzsý, jaryq, káriz jelileri tolyǵymen tartylǵan. Qabyrǵasy gazablokpen qalanǵan. Sondaı-aq ınvestorlar kómek retinde óz qarjysyna úıdiń syrtyn qorshap, otyn jáne kómir qora salyp beripti. Ashyq konkýrs rásimi aıaqtalsa, Qarashoqy aýylyndaǵy 8 otbasy baspanaly bolmaq.
Odan keıin sol eldi mekende «Qýanysh-7» balabaqshasynyń ashylý saltanaty ótti. Sharada balabaqsha salyp, ata-anany da, balany da, jalpy aýyl jurtshylyǵyn qýantqan kásipker Nurjan Musabekov sóz sóılep, kópshilikti merekesimen quttyqtady. Jańa ashylyp jatqan balabaqshada baldyrǵandardyń taǵylymdy tárbıe alýyna tilektestigin bildirdi.
«30 jyl bos turǵan ǵımaratty kúrdeli jóndeýden ótkizip, baldyrǵandardy qýantaıyq dep, balabaqsha ashtyq. Bizde budan bólek, Almatyda da salǵan balabaqshamyz bar. Sondyqtan bul salada tájirıbemiz jetkilikti. Aldaǵy ýaqytta balpań basqan baldyrǵandarymyz qazaqy tárbıeni boıyna sińirip, mektepke saqadaı saı bolyp barady degen senimimiz mol», dep balabaqshanyń ashylýyna kómektesken aýdan ákimine alǵys aıtty.
Osydan keıin sharaǵa jınalǵan qaýym balabaqshanyń ishin aralap, jumysymen tanysty. Byltyr 16 qarashada kásipker Nurjan Musabekov pen jary Jolaman aýylynyń týmasy Aınur Aqanqyzy memlekettik satyp alý arqyly 1960 jyly irgesi qalanyp, keıin bos qalǵan burynǵy keńse ǵımaratyn satyp alǵan. Týǵan jerge týyn tigýdi maqsat tutqan kásipkerler 120 mln teńgege kúrdeli jóndeý júrgizip, arnaıy balabaqsha ashýdy oılaıdy. Mine, baldyrǵandardyń úıi 1 tamyzdan bastap 75 balaǵa arnalǵan 3 toppen jumys istep keledi.
Atalǵan nysanda balalardyń tárbıesi men damýyna jaýapty 14 túrli maman óz qyzmetin atqarady. Ár maman balanyń jas erekshelikterine sáıkes kásibı bilim men daǵdylardy qoldana otyryp, tárbıelenýshilerdiń jan-jaqty damýyna úlken úles qosady. Balalardyń oqý, oıyn, jatyn bólmeleri, mýzykalyq zaly ásem bezendirilgen. Bári de talapqa saı. Baldyrǵandardyń qaýipsizdigin qamtamasyz etý maqsatynda beınebaqylaý ornatylǵan. Munda 2-den 6 jasqa deıingi balalar qabyldanady. Bul qalaǵa qatynap jumys isteıtin ata-analar úshin de óte yńǵaıly.
Jetisý oblysy