Mádenıet jáne aqparat mınıstri Aıda Balaevanyń basshylyǵymen Qazaqstan delegasııasy Sankt-Peterbýrgte onynshy Halyqaralyq mádenı forýmǵa qatysyp jatyr. Bul is-shara 80 eldiń ókilin jınap, memleketter arasyndaǵy yntymaqtastyq pen mádenı murany saqtaý jáne gýmanıtarlyq baılanystardy nyǵaıtý máselelerin talqylaý alańyna aınaldy.
Aıda Balaeva óz sózinde Qazaqstan Prezıdenti Qasym-Jomart Toqaevtyń dástúrli jáne otbasylyq qundylyqtardy saqtaýǵa erekshe kóńil bóletinin atap ótti.
«Dástúrli jáne otbasylyq qundylyqtar – qýatty qoǵamnyń negizi, al ony nyǵaıtatyn – úzdiksiz damyp jatqan mádenıet salasy. Mádenıet jas urpaqty óner álemine baýlyp, ádemilikti túsinýdi qalyptastyrýǵa, empatııa men gýmanızmge ashyq bolýǵa áser etedi. Ol adamdy san alýan oıǵa jetelep, qoǵam men memleket aldyndaǵy jaýapkershiligin sezinýge mindetteıdi», dedi mınıstr.
Sondaı-aq Aıda Balaeva teatr, konserttik is-sharalar, mýzeı isi men kreatıvti ındýstrııany qamtıtyn úshjyldyq mádenı yntymaqtastyq josparyn ázirleýdi usyndy. Bul jospardyń basym baǵyttarynyń biri – dástúrli jáne otbasylyq qundylyqtardy nasıhattaý. Osy baǵytta alǵashqy qadam retinde dástúrli jáne otbasylyq qundylyqtarǵa arnalǵan kórkem fılmniń úzdik ssenarııine halyqaralyq konkýrs uıymdastyrý, ekologııa men qoǵamdyq mádenıet taqyrybynda halyqaralyq sýretshiler festıvalin ótkizý usynyldy.
Forýmnyń paneldik sessııalarynda Qazaqstan mádenıet qaıratkerleri – Astana Ballet teatry dırektorynyń orynbasary Valerıı Kýzembaev pen Qazaqstan Ulttyq mýzeıiniń dırektory Aıbek Sydyqov ta sóz sóıledi. Olar yntymaqtastyqty damytý jónindegi oı-pikirimen bólisip, halyqaralyq mádenı jobalardaǵy el tájirıbesin tanystyrdy.
Sonymen qatar X Peterbýrg halyqaralyq mádenı forým aıasynda Qazaqstan Mádenıet jáne aqparat mınıstri Aıda Balaeva men RF Mádenıet mınıstri Olga Lıýbımova mádenı yntymaqtastyqtyń negizgi máselelerin talqylady.