Qusbegilik túrki halyqtaryna jat emes. Ertede qazaqtar jylqy malynyń babyn taýyp, tazy júgirtip qoımaı, qusbegilikpen de júıeli aınalysqan. Ańshylyqqa osy eki júırikpen shyqsa, qorjyn bos qaıtpaǵan. Biri – jerdegi júırik bolsa, ekinshisine – kókte teń keletin qus joq.
Kóshpeliler oıyndarynda qusbegilikten eki kúnge jalǵasqan dodada ulttyq qurama sportshylary 2 altyn, 1 kúmis, 3 qola medaldy enshiledi. Qusbegiler saıysynda júlde alǵan úzdikterge federasııa demeýshisi, kásipker Talǵat Saqan qusbegiler Serikbek Kúntýǵan men Erzat Baıqadamovqa avtokólik syılady.
«Búrkit salý» sanatynda birinshi oryndy ulttyq qurama múshesi Serikbek Kúntýǵan ıelendi. Onyń «Alǵyr» atty qusy fınalda 12 qustyń ishinen úzdik shyqty. Eki jattyǵý boıynsha ótken tartysta ekinshi orynǵa «Zańǵar» degen qusymen Erzat Baıqadamov kóterilse, qola medal «Naryn» atty búrkitin topqa qosqan Arman Qoshqarovqa buıyrdy.
«Qarshyǵa salý» sanaty boıynsha birinshi oryndy «Naızatuıaq» qusymen astanalyq Qudaıbergen Raýıluly jeńip alsa, ekinshi oryndy Qyrǵyzstan sportshysy Ádilbek Qudaıberdıev ıelendi. Ol «Qaramonshaq» qusymen óner kórsetti. Bul saıysta júldeni taǵy bir otandasymyz Baǵdat Keýenov «Sombalaq» qarshyǵasymen jeńip aldy.
Ulttyq quramanyń jigitteri «Itelgi salý» sanatynda da júldesiz qalmady. Bul synda altyn, kúmis medal Qyrǵyzstan sportshylarynyń enshisinde qalsa, qola medal ulttyq qurama múshesi Baqdáýlet Babajanǵa buıyrdy.
Dúbirli dodada qusbegilikten el qorjynyna medal salǵan ulttyq qurama músheleri demeýshilerdiń qoldaýymen Kusbegilik federasııasy atynan arnaıy syılyqtarǵa ıe boldy. Úshinshi oryn alǵan Arman Qoshqarov, Baǵdat Keýenov jáne Baqdáýlet Babajan 300 myń teńgeden alsa, ekinshi oryndy jeńip alǵan Erzat Baıqadamovqa 500 myń teńge syıaqy buıyrdy. Qarshyǵa salý sanaty boıynsha birinshi bolǵan Qudaıbergen Raýıluly 1 mln teńge syıaqy aldy. Sondaı-aq qusbegilikten júldeli bolǵan sportshylarǵa demeýshilerdiń esebinen basqa da syı-sııapat kórsetildi.