Egıpettik farmasevtıkalyq kompanııa elimizden bıofarmasevtıkalyq zaýyt salý úshin 33 mln AQSh dollaryna jýyq qarjyny ınvestısııalaýǵa daıyn, dep habarlaıdy Egemen.kz QR Densaýlyq saqtaý mınıstrliginiń baspasóz qyzmetine silteme jasap.
QR densaýlyq saqtaý mınıstri Aqmaral Álnazarova «EIPICO» egıpettik farmasevtıkalyq kompanııasy ókilderimen kezdesti. Taraptar Qazaqstanda tolyq sıkldy bıofarmasevtıkalyq zaýyt salý boıynsha ınvestısııalyq jobany talqylady.
«Joba aıasynda qazaqstandyq azamattar úshin 200-ge jýyq jańa jumys oryndary ashylady dep kútilýde. Zaýyt qurylysy sonymen qatar Qazaqstannyń farmasevtıkalyq sektordaǵy ornyn kúsheıte túsip, mańyzdy dárilik zattar óndirisin lokalızasııalaýǵa yqpal etedi» delingen QR Densaýlyq saqtaý mınıstrliginiń habarlamasynda.
Kezdesý nátıjesinde taraptar jobany júzege asyrý maqsatynda aldaǵy yntymaqtastyq týraly ýaǵdalastyqqa qol jetkizdi.