Elordada múgedektigi bar adamdarǵa arnalǵan alǵashqy oqý-ádistemelik resýrs ortalyǵynyń tusaýy kesildi. «Eýrazııalyq ınklıýzııa ortalyǵy» mekemesi qalalyq ortadaǵy áleýmettik, kólik ınfraqurylymy men qyzmetterdi, týrıstik baǵdarlardy erekshe adamdarǵa qoljetimdi etýdi maqsat etip otyr.
Jobany seriktes taraptarmen birlese otyryp, «Samuryq-Qazyna» AQ kompanııalar tobynyń biryńǵaı qaıyrymdylyq operatory – «Samruk-Kazyna Trust» qory qarjylandyrdy. Astanada bastaý alǵan ıgilikti is búkil elge taralyp, biryńǵaı úılestirý ortalyǵy saladaǵy túıtkildi máselelerdi sheshýge septigin tıgizbek. Osylaısha, turǵyndarǵa qyzmet kórsetetin uıymdar men ákimdikterdiń jumys tıimdiligin baǵalap, bekitetin ádister men quraldar engiziledi. Tıisti sharalar aıasynda quzyrly organdarmen oqý baǵdarlamalary kelisilip jatyr. Bolashaqta nysandardyń qoljetimdiligin baǵalaýǵa ókiletti sarapshylar men tekseristen ótken nysan-qyzmetter tizilimi (reestr) túzilmek.
«Bul tyrnaqaldy qadamnyń mańyzy bar dep oılaımyn. Sebebi qolarbada otyratyn azamattarǵa jasalǵan jaǵdaı barysynda kózi kórmeıtin, qulaǵy nashar estıtin jandardyń quqyǵy eskerilmeýi múmkin. Sonymen qatar ınklıýzııa pandýs ornatý ǵana emes, qoǵam qarym-qatynasynyń ózgerýi dep túsingen jón. Al resýrs ortalyǵynda múgedektigi bar adamdar qatarynan arnaıy sarapshylar daıarlanyp, olardy tolyqqandy tabyspen qamtýǵa da múmkindik týyndamaq. Munyń bári Qor basshylyǵynyń ınklıýzııany, teń qoǵamdy damytýdaǵy keshendi kózqarasynyń nátıjesi bolady dep úmittenemiz», dep atap ótti «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva.
Osy oraıda qaıyrymdylyq operatory jobany júzege asyrý jaýapkershiligin moınyna alǵan «Eýrazııalyq ınklıýzıvti qoǵamdy damytý qaýymdastyǵy» ZTB syndy úkimettik emes uıymdarmen jemisti yntymaqtastyq ornatqan. Nátıjesinde, kelesi 2025 jyldyń sáýir aıyna deıin qajet kezde dereý kásibı kómek kórsetetin 100 sarapshy-nusqaýshy daıarlanyp, sáıkesinshe bastapqy sátte 100 nysandy qoljetimdilikke baǵalaý is-qımylymen qamtý josparlanady. Buǵan deıin, mamyr aıynda ótken semınarlarda halyqaralyq standarttar tanystyrylyp, múgedektigi bar adamdarmen tildesý ádebi, qalalyq orta men mekemelerdiń qoljetimdiligi, ujymdyq psıhologııa sııaqty baǵyttarda mınıstrlikter, Astana qalasy men aýdandarynyń ákimdikteri qyzmetkerleri, depýtattar men qoǵamdyq uıymdar ókilderi, «Samuryq-Qazyna» AQ kompanııalar tobynyń qyzmetkerleri oqytyldy.
Eske sala ketsek, Qor bıylǵy jańa oqý jylynda Astananyń 5 mektebinde ózindik úlgidegi ınklıýzııany qoldaý kabınetterin ashyp, erekshe bilim berýdi qajet etetin 150-den astam bala basqa qatarlastarymen birge oqı alatyn boldy.
Jalpy, «Samuryq-Qazyna» AQ korporatıvtik áleýmettik jaýapkershilik aıasynda erekshe qajettilikteri bar adamdardy keshendi túrde qoldap keledi. Oǵan dálel, elimiz óńirlerinde 42 ońaltý ortalyǵy, 10 sport kesheni iske qosyldy. 23 qala men eldi mekende 1000-nan astam bala qatysatyn beıimdelgen sport seksııalary jumys istep tur. Múgedektigi bar jastar sıfrlyq kásipterge oqytylyp jatyr. Osylaısha, adamdarǵa týǵanynan bastap járdem jasalyp, olardyń qoǵamǵa áleýmettenýine barlyq jaǵynan yqpal etiledi.
Aldabergen KEMPIRBAI