«Amanat» partııasy fraksııasynyń múshesi, depýtat Danabek Isabekov Qazaqstanda jedel medısınalyq kómek kórsetý erejesi men qaǵıdalaryn qaıta qarap, ózgeris engizý qajet ekenin alǵa tartyp, QR Densaýlyq saqtaý mınıstri Aqmaral Álnazarovaǵa depýtattyq saýal joldady, dep habarlaıdy Egemen.kz.
Prezıdent Qasym-Jomart Toqaev bıylǵy Qazaqstan halqyna Joldaýynda densaýlyq saqtaý salasyna toqtalyp, otandyq medısınany jetildirýde jekemenshik sektordy tartýdy tapsyrǵan edi. Danabek Isabekov mundaı júıeli jumystardy jedel járdem qyzmetinde de qoldaný kerek dep sanaıdy. Depýtat elimizde jedel medısınalyq kómek kórsetý erejesin qaıta qaraý óte mańyzdy ekenin aıtty.
«Erejeniń 2-taraýynyń 11-tarmaǵynda dárigerlik brıgadanyń dıspetcherden pasıentke deıin jetý ýaqyty aıqyn belgilengen. Degenmen, iri qalalardan bastap, kentter men aýyldarǵa deıin normamen belgilenbegen ýaqytta jedel járdem qyzmeti jetpeıtinin jıi estımiz. Mundaı jaǵdaı jaqynda bizdiń áýletimizge de bolǵan. Naqtyraq aıtqanda, 23 shildede ákem kenetten ózin nashar sezinip, aýyryp qaldy. Jedel járdem qyzmetine saǵat 13:50-de shaqyrtý berildi. Alaıda jádel járdem qyzmetkerleri 30 mınýtta áreń jetti. Bul aralyqta ákemniń jaǵdaıy tym nasharlap qalǵan-dy. Shymkent qalasy «Jedel medısınalyq járdem kórsetý stansııasy» ereje boıynsha pasıettiń jaǵdaıy 2-shi jedeldik sanatta bolǵandyqtan 15 mınýtta jetýi tıis edi. Biraq jedel járdem keshigip, ákemizden aıyrylyp qaldyq», dep kúrsindi depýtat.
Onyń aıtýynsha, bul birinshi jaǵdaı emes. Jedel járdem óz ýaqytynda keletin bolsa, kóptegen naýqasty ajaldan arashalap qalýǵa múmkindik týar edi. Biraq erejeniń osy normalary kóp jaǵdaıda saqtala bermeıdi. Keıde jedel járdem qyzmetkerlerin 1 saǵattan astam ýaqyt boıy kútip otyrý kerek.
«Muny qalaı jedel járdem dep ataýǵa bolady? Máselen, AQSh, Kanada, Jańa Zelandııa, Aýstrııa, Irlandııada jedel járdem qyzmetiniń basty ereksheligi – olar óte shuǵyl (ekstrennyı), shuǵyl (neotlojnyı) dep ekige bólinip, naýqastarǵa qyzmet kórsetedi. Osy tájirıbeni bizge de engizý qajet dep bilemin», dep qosty Danabek Isabekov.
Osyǵan oraı depýtat Densaýlyq saqtaý mınıstrligine kelesi sharalardy qolǵa alýdy usyndy:
Jedel járdemniń pasıentke jetetin ýaqytyn qaıta qarap, álem elderiniń tájirıbesin zertteý. Jedel járdem salasyna jekemenshik sektordy engizip, básekelistikti arttyryp, servıstik qyzmet salasyn jetildirý. Jedel járdem brıgadalarynyń jumystaryna tekserý júrgizý jáne kólikteriniń jaǵdaıyn anyqtaý, mamandardyń biliktiligin qatań baqylaýǵa alý.