Astanada Tájikstan, Túrikmenstan, О́zbekstan jáne baqylaýshy el retinde qatysyp otyrǵan Qyrǵyzstan delegasııalarynyń qatysýymen Halyqaralyq Araldy qutqarý Qory Basqarmasynyń otyrysy ótip jatyr. Otyrys barysynda Qazaqstannyń tóraǵalyǵy kezinde Halyqaralyq Araldy qutqarý Qory Atqarý komıtetiniń jumys jospary bekitildi, dep habarlaıdy Egemen.kz QR Sý resýrstary jáne ırrıgasııa mınıstrligine silteme jasap.
Atalǵan jospar quryltaıshy memleketterdiń basshylary men HAQQ Prezıdentiniń tapsyrmalaryn iske asyrýdy, Qordyń uıymdyq qurylymy men sharttyq-quqyqtyq bazasyn jetildirýdi, halyqaralyq yntymaqtastyqty nyǵaıtý men keńeıtýdi, HAQQ atqarý komıtetiniń qurylymdyq bólimsheleriniń jumysyn úılestirýdi, tabıǵı resýrstardy qorǵaý jónindegi aqparattyq, taldamalyq jáne úgit jumystaryn, óńirlik jáne halyqaralyq is-sharalardy uıymdastyrýdy, ótkizýdi jáne olarǵa qatysýdy qamtıdy.
Sondaı-aq josparda eki aýqymdy jobany odan ári iske asyrý kózdelgen. Bul - Aral teńizi basseıni elderine kómek kórsetý jónindegi is-qımyl baǵdarlamasy, onyń sheńberinde óńirde 35 joba iske asyrylyp jatyr. Budan bólek, Qor Qazaqstan, Qyrǵyzstan, Tájikstan, Túrikmenstan jáne О́zbekstan kiretin Memleketaralyq sý sharýashylyǵyn úılestirý komıssııasyna jáne HAQQ ornyqty damý jónindegi memleketaralyq komıssııaǵa belsendi túrde járdemdesýge nıetti.
«О́zderińiz biletindeı, búgingi tańda Prezıdentimiz Halyqaralyq Araldy qutqarý Qorynyń basshysy bolyp saılandy. Qordyń tóraǵasy retinde bizdiń elimizge úlken jaýapkershilik júktelgen jáne Biz Ortalyq Azııanyń basqa memleketterimen tyǵyz qarym-qatynasta bolamyz. Biz birlesip Aral teńizin saqtaý boıynsha eleýli nátıjelerge qol jetkizdik jáne osy baǵyttaǵy jumysty ári qaraı jalǵastyrýǵa nıettimiz», dedi Sý resýrstary jáne ırrıgasııa mınıstri Nurjan Nurjigitov.