О́nerde shekara joq. О́nerde talaı taǵdyr bar. Tasty jaryp shyqqan talant ta óner bıigin baǵyndyra alatyny sózsiz. Kúni keshe ǵana Londonnan súıinshi habar jetti. Elordalyq Abylaı Mustafın Londonda ótken «Altyn ýaqyttyń daryny» óner baıqaýynda ortasynan oza shaýyp, bas júldeni enshiledi.
Jas talant halyqaralyq konkýrsta Qazaqstan avtorlarynyń shyǵarmalaryn fortepıanoda oryndap, sheteldik qazylardyń joǵary baǵasyna ıe bolǵan. Aıta keteıik, Abylaı – Astanadaǵy Jumabek Táshenov atyndaǵy mektep-gımnazııanyń 9-synyp oqýshysy. Sondaı-aq Roza Baǵlanova atyndaǵy №2 mýzykalyq mektepte bilim alady. Zaǵıp bolsa da ónerge qushtar. Birinshi toptaǵy múgedek adamnyń múmkindigi sheksiz dep sanaıdy.
Eske salsaq, jas ónerpaz buǵan deıin «Habar» telearnasynan kórsetilgen «Juldyzaı» baıqaýynda laýreat atansa, búgin halyqaralyq óner dodasynda top jardy. «Jeńimpaz bolyp jatqanyma baqyttymyn. Múmkindik bergeni úshin mýzykalyq mektep muǵalimi Olesıa Ivanovnaǵa, anam men ákeme rahmet», halyqaralyq baıqaýdyń bas júldegeri.
Abylaı esepke de júırik. Germanııa, Túrkııada mentaldy arıfmetıkadan ótken olımpıadada top jaryp, júldeli orynǵa ıe bolǵan. Jas óren bolashaqta IT salasynyń mamany bolýdy qalaıdy.
Sondaı-aq atalǵan óner dodasynda almatylyq sýretshi Ásemgúl Súleımenova da bas júldeni jeńip aldy.
«Meniń basty maqsatym – qazaqy naqyshtaǵy sýretterimdi álemge tanytý. Bizdiń elimizde de óner adamdary kóp ekenin, bar ekenin bildirgim keledi», deıdi Ásemgúl Súleımenova.
Atalǵan baıqaýǵa elimizden barǵan úmitkerler kóp. Atap aıtsaq, aǵaıyndy Gúlimaı, Dinmuhammed, Nurbaqyt Talap sahnaǵa shyǵyp, ulttyq ónerimizdi áıgiledi. Dombyrada qazaq kúıin kúmbirletti. Dodaǵa balalarmen qatar kásibı mýzykanttar da qatysty. «Birinshiden, úrlemeli aspap kvıntetimizge bıyl 20 jyl tolyp otyr. Osy oraıda bul baıqaýǵa arnaıy keldik. Ulttyq ónerdi tanytyp, qazaqtyń turmys-saltyn, san túrli dástúrin kórsetýdi maqsat ettik», deıdi Qurmanǵazy atyndaǵy Qazaq ulttyq konservatorııasynyń professory Janat Ermanov.
Bıyl tórtinshi jyl qatarynan ótip jatqan «Altyn ýaqyttyń daryny» halyqaralyq baıqaýyn Ýkraına azamattary uıymdastyryp otyr. Olar mýzyka, beıneleý óneri, horeografııa jáne basqa da atalymdar boıynsha onlaın irikteýden ótken 25 eldiń ókilin Ulybrıtanııaǵa shaqyrǵan. Baıqaýǵa qatysý aqyly. Odan bólek vıza jáne jol shyǵyndary bar. Al qazaq ónerpazdarynyń Londonǵa barýyna demeýshiler qoldaý kórsetken.
«Úlken daryn ıelerine arnalǵan dúbirli doda kóp. Bizdiń baıqaýǵa ózin áli tanytyp úlgermegen, biraq talantty óner adamdary qatysady. Bes jastaǵy baladan bastap jetpisten asqan qarııaǵa deıin sahnaǵa shyǵyp jatyr», deıdi baıqaý uıymdastyrýshylary.
Jeńimpazdardyń esimderi baıqaýdyń resmı saıtyndaǵy úzdikter tizimine engiziledi. Sondaı-aq ozyq oqý oryndarynan shaqyrýlar alyp, sheteldik kompanııalar olarǵa qyzmetter usyný múmkindikteri de kezdesedi. Qatysýshylar daryndylar vızasyna ıe bolyp, Ulybrıtanııa men AQSh-ta ónerlerin shyńdaı alady.