Aqtóbe qalasyndaǵy Uzaqbaı Qulymbetov atyndaǵy №64 mekteptiń 7-synyp oqýshysy Danııal Qurmanǵalı Ahmet Baıtursynuly týraly tolyqqandy maǵlumat beretin mobıldi qosymsha ázirledi.
Mektep oqýshysy uly aǵartýshynyń ómiri men eńbekterin bir jerge jınaqtap, paıdalanýshylarǵa qoljetimdi etken.
«Ǵalamtorda Ahmet Baıtursynuly týraly aqparattar kóp bolǵanymen, olar ártúrli derekkózde shashyrańqy kúıde kezdesedi. Men barlyq málimetti bir jerge jınaqtap, yńǵaıly platformada usynýdy jón kórdim. Nátıjesinde, bir resýrsqa biriktirilgen mobıldi qosymshany «Play Market» ınternet dúkenine júktedim», deıdi Danııal.
Mobıldi qosymshaǵa ult ustazynyń ómirbaıany, shyǵarmalary, naqyl sózderi, óleńderi men ǵylymı eńbekteri engen. Odan ózge ǵalymnyń shyǵarmashylyǵy boıynsha test uıymdastyrylǵan, bul paıdalanýshylarǵa HH ǵasyr basyndaǵy ult zııalylaryna qatysty bilimderin tekserýge múmkindik beredi. Sýretter, beınejazbalar men syrtqy siltemeler de qosymshanyń mazmunyn baıyta túsedi. Kóp ýaqyt ótpese de, Danııaldyń qosymshasyn «Play Market» platformasynan myńǵa jýyq adam júktep úlgeripti. Ol aldaǵy ýaqytta ult qaıratkerlerine arnalǵan basqa da qosymshalar ázirleýdi josparlap otyr. «Maqsatym – qazaq tilindegi mobıldi qosymshalardy kóbeıtip, ana tilimizde sıfrlyq ónimder jasaýdyń mańyzdylyǵyn arttyrý», deıdi talapty oqýshy.
Danııal ult qaıratkerleriniń eńbekteri týraly qosymsha málimetter izdeýge oqýshylardyń kóp ýaqyty jumsalatynyn ustazy Erbol Medeýovke aıtqan. Mektep muǵalimi zeıindi oqýshynyń Ahmet Baıtursynulynyń eńbekteri men ómirbaıanyn hronologııalyq tártippen jınaqtaý bastamasyn quptap, kómek kórsetken. Ustazdar daryndy oqýshynyń tyń bastamasy elimizdegi orta bilim salasyndaǵy qazaq tilindegi sıfrlyq kontenttiń damýyna úles qosatynyna senimdi.
Aqtóbe oblysy