Búgin AES salýdy qoldaý jónindegi Halyqtyq shtab Qyzylorda qalasyna jetti. Munda analar qaýymymen, aqsaqaldarmen, aýyl turǵyndarymen jáne eńbek ujymdarymen birqatar kezdesý ótti, dep habarlaıdy Egemen.kz.
Qyzylorda qalasyndaǵy «Anaǵa taǵzym» ortalyǵynda óńirdegi analar qaýymymen kezdesý ótti. Shtab músheleri atap ótkendeı, Memleket basshysy Qasym-Jomart Toqaev ana men balany qoldaý máselesine aıryqsha nazar aýdarady. Jyl saıyn áleýmettik tólemder somasy ósýde, «Ulttyq qor – balalarǵa» baǵdarlamasy jumys isteı bastady, al jýyrda «Keleshek» biryńǵaı erikti jınaqtaý júıesi engiziledi.
Halyqtyq shtab músheleri analar qaýymymen atom energetıkasyn damytýdyń zamanaýı álemdik trendterin talqylady, elimizde beıbit atomdy damytý baǵytynda jasalyp jatqan jumys týraly aıtyp, qatysýshylardyń suraqtaryna jaýap berdi. Ár qazaqstandyqtyń aldaǵy referendýmǵa qatysýynyń mańyzy erekshe atap ótildi. Bul qoǵamdaǵy dıalogty nyǵaıtyp, azamattardyń saıası mádenıetin arttyrady.
Dalatex tigin fabrıkasynda, «Torǵaı-Petroleým» munaı kompanııasynyń óndiris alańynda AES salýdy qoldaý jónindegi Halyqtyq shtab músheleri kásiporyndardyń eńbek ujymdarymen ónerkásiptik nysandardyń júıeli jumys isteýi jáne bıznestiń damýy úshin turaqty energııamen jabdyqtaýdyń mańyzyn talqylady.
Sonymen qatar, Halyqtyq shtab Syrdarııa aýdany Aqjarma aýylyna jáne Qazaqstan aýmaǵyna kúrish ósiretin sharýashylyqtarymen tanymal Naǵı Ilııasov atyndaǵy aýylǵa bardy. Shtab músheleri turǵyndarmen áńgimelesý barysynda aýyldyq aýmaqtardy damytý perspektıvalary men aýyl turǵyndaryn tolǵandyrǵan ózekti máselelerge egjeı-tegjeıli toqtaldy. «Aýyl» partııasynyń Tóraǵasy Serik Egizbaev aýyl turǵyndaryn aldaǵy referendýmǵa belsendi qatysýǵa shaqyrdy.
«Halyqtyq shtab músheleri óńirlerdi aralaý barysynda kóterip júrgen basty másele – aldaǵy 6 qazanda ótetin referendým. Qazaqstan halqynyń atom elektr stansııasyn salýǵa qatysty kózqarasy – asa mańyzdy. Sondyqtan referendým ótkiziletin kún týraly sheshim qabyldanǵan kezde Qazaqstan Respýblıkasynyń barlyq qoǵamdyq jáne saıası kúshteri birikti. Sebebi bul – jalpyulttyq másele. Ol qandaı da bir saıası nemese qoǵamdyq kózqarasqa bólinbeıdi. Onyń árqaısymyzǵa qatysy bar», dedi Serik Egizbaev.