ASTANA. 27 qańtar. Kýba revolıýsııasynyń lıderi Fıdel Kastro biraz ýaqytqa sozylǵan únsizdikten keıin únin shyǵaryp, birinshi ret Kýba men AQSh-tyń arasyndaǵy dıplomatııalyq qarym-qatynastyń qalpyna keltirýine baılanysty óziniń oıyn bildirdi. Bul týraly Lenta.Ru habarlady.
«Men AQSh-tyń saıasatyna senbeımin, sondyqtan da olardyń ókilderine bir aýyz sóz de aıtqan joqpyn. Alaıda, bul áskerı janjaldy beıbit jolmen sheshýden bas tartýdy bildirmeıdi», - dep atap ótti Fıdel Kastro óziniń sózinde.
Onyń aıtýynsha, AQSh pen Latyn Amerıkasy elderi arasyndaǵy qarym-qatynastyń eshqandaı kúsh qoldanylmaı sheshilgen kez kelgen problemalarynyń rettelýi tıisti halyqaralyq normalar men prınsıpter turǵysynan qaralýy kerek.
«Biz qashanda búkil álem halyqtarymen, sonyń ishinde óz qarsylastarymyzben aradaǵy yntymaǵymyz ben dostyǵymyzdy qorǵaıtyn bolamyz», - degendi qosty 88 jastaǵy Kýba revolıýsııasynyń kósemi.
Kýba 12 qańtar kúni AQSh-pen jasalǵan kelisim sheńberinde 53 saıası tutqyndy bostandyqqa shyǵardy. Vashıngton bul taraptaǵy jumystyń kúsheıe beretinin aıtyp otyr. Biraq resmı Gavana elde saıası tutqynnyń joq ekenin jetkizdi. Kýba bıligi ádette mundaı adamdardy «Amerıkanyń aqsha tólep qoıǵan jaldamalylary» dep ataıdy.
AQSh pen Kýbanyń jarty ǵasyrǵa sozylǵan jaýlyq qarym-qatynasynyń sońy ótken jyldyń jeltoqsan aıynda aıaqtalǵandaı bolyp kórinedi. Osy kezde AQSh prezıdenti Kýbamen jaqyndasý baǵytynyń ustalatynyn jarııalap jiberdi.
Eki eldiń arasyndaǵy teketires 1959 jyly Bostandyq araly revolıýsıonerler qoldaryna kóshkennen keıin bastaldy.
Murat Aıtqoja.
Derek, sýret: Lenta.Ru.