Shymkentte qurylys ornynda áriptesin óltirgen er adam 13 jylǵa sottaldy, dep habarlaıdy Egemen.kz.
Atalǵan isti Shymkent qalasynyń qylmystyq ister jónindegi mamandandyrylǵan aýdanaralyq soty qarady. Er adam QR Qylmystyq kodeksiniń 99-babynyń 1-bóligi boıynsha aıyptalǵan.
Sotta belgili bolǵandaı, sottalýshy Shymkent qalasy «Nurshýaq» móltek aýdany Jańaqurylys jer teliminde qurylys obektisinde birge jumys jasaıtyn N.-men birge spırttik ishimdik iship, aralarynda urys-janjal týyndaǵan.
«Sonyń saldarynan N. esimdi azamat E.-niń betine judyryǵymen bir ret soqqy jasaǵan. Buǵan qatty ashýlanǵan E. qarsylasy N.-nyń qolyndaǵy ashana pyshaǵyn tartyp alyp, moınynan pyshaqpen birneshe ret soqqy jasaǵan. Sonyń saldarynan jábirlenýshi alǵan aýyr dene jaraqattarynan oqıǵa ornynda qaza bolǵan», delingen sot habarlamasynda.
Sot sottalýshynyń jasaǵan qylmystyq áreketteri ishinara moıyndaýmen qatar, jábirlenýshi ókili men kýálerdiń jaýaptarymen, aıǵaq zatty alý hattamalarymen, sot saraptamalarynyń qorytyndylarymen jáne de basty sot talqylaýynda zerttelgen basqa da is materıaldarymen tolyq dáleldendi.
Prokýror E.-ǵa 13 jyl merzimge bas bostandyǵynan aıyrý jazasyn taǵaıyndaýdy surady. Jábirlenýshi ókili prokýrordyń osy ustanymymen kelisti.
«Sot sottalýshynyń qylmystyq jaýapkershiligin jeńildetetin mán-jaılar retinde kinásin ishinara moıyndaǵanyn, jasaǵan qylmysyna ókinetinin, al aýyrlatatyn mán-jaılar boıynsha jasaǵan qylmysy asa aýyr qylmystar sanatyna jatatynyn, E.-nyń is-áreketinde qylmystardyń qaýipti qaıtalanýyn tanyǵanyn jáne jábirlenýshi ókiliniń keshirim bermegenin eskerdi. Sot E. esimdi azamatqa QK-niń 99-babynyń 1-bóligimen 13 jyl merzimge bas bostandyǵynan aıyrý jazasy taǵaıyndady jáne sottalýshynyń áreketterinde qylmystyń qaýipti qaıtalaný belgileri bar dep tanydy», delingen habarlamada.
Jazany sottalýshy qylmystyq-atqarý júıesiniń qaýipsizdigi barynsha joǵary mekemelerinde óteýge belgiledi.
Úkim zańdy kúshine endi.