BIR ÚMIT, BIR KÚDIK

Álem chempıonyna ne bolǵan? Jeksenbi kúngi oıyndar taǵy da sensasııalyq jaǵdaılarǵa toly boldy. Paragvaıdyń Slovakııany, álem chempıony Italııanyń osy toptaǵy eń álsiz qurama sanalatyn Jańa Zelandııany jeńeti­nine kúmándanatyndar az bolǵan. Paragvaı Slovakııa quramasyn 2:0 esebimen utty. Osylaı bolýy tıis desti jankúıerler. О́ıtkeni, slovaktar azýsyz boldy. Tipti olar, oıynnyń tez aıaqtalýyn kútkendeı de áser qaldyrdy. Al, Jańa Zelandııa... Iá, bul komanda aıdy aspanǵa shyǵardy! Álemdik reıtıngte Italııa quramasy bestiktiń ishinde bolsa, Jańa Zelandııa 78-shi orynda-tyn. Mundaı jaǵdaıda ıtalıandyqtar qarsylastarynyń qaqpasynyń aýzyn qurǵatpasa kerek edi. Biraq, maqtaǵan quramamyz alǵashqy kezeńde belsendilikti qarsylas­taryna berip qoıyp, sonyń ashy jemisin aldymen tatty. Standarttan Ýınston Rıd qaqpaǵa baǵyttap shirene tepken. Qyrsyq shalǵanda dop álemdegi eń úzdik qorǵaýshylardyń biri Kannovaronyń denesine tıip, qaqpa aldynda qankóbelek oınap qaldy. Tegin oljany Smels qaq­paǵa súńgitti de jiberdi. Bul oıyn­nyń bar bolǵany 7-shi mınýtyn­daǵy oqıǵa edi. Dzambrotta aıaǵyna ilikken dop­ty Jańa Zelandııa qaqpasy­nyń aldyna tastaýǵa tyrysty. Shabýyl­shylardan qaıran bol­maǵan­nan keıin ózi de belsenip áreket jasap kórmek edi. Jan bermek ońaı emes. Italıandyqtar qursaýdaı qysyp bara jatqan soń qorǵaýshy Tommı Smıt De Rossı­diń jeıdesine jarmasty. Mundaı jaǵdaıda penaltı belgilenedi. Iаkvınta qapysyz soqty. Esep ­–1:1. Sońǵy 15 mınýtta Jańa Zelan­dııa qaqpasynyń aldynda daýyl turǵanymen, ıtalıandyqtar jeńis­ti bókterip kete almady. Olar qaq­pany 25 ret kózdegenimen, golǵa laıyq 7 dopty Mark Paston qaıtardy. Buǵan ıtalıan­dyq­tar­dyń taǵy da 15 ret buryshtan dop tepkenin qosyńyz. Osyndaı nópir shabýylǵa tótep berip, upaı bólisken Jańa Zelan­dııa fýtbolshylarynyń erligin ba­ǵa­­laý kerek. Italııa alǵashqy oıy­nynda Paragvaımen teń oına­dy, bul joly da teń. Slovaktar­men ıtjyǵys túsken Jańa Zelan­dııa nege óz tobynan shyǵyp qala­dy?! Rıkı Herbert bapker úmitti. Al, ıtalıandyq­tardyń bapkeri Mar­chello Lıppı­diń qabaǵynan qar ushqyndap, sirkesi sý kótermeı júr. Álem chempıony jaǵdaıyn qıyndatyp aldy. BRAZILIIаLYQTAR AIDARYNAN JEL ESEDI Kakasy bar el baqytty ǵoı. Qaı klýbta oınasa da Kakanyń janynan tabylýǵa shabýylshy bitken qumar. Ásirese, argentına­lyq Igýaın. Kakaǵa dop tıse ókpe­sin qolyna alyp, qaqpa aldyna jetedi. Transferde oıynshylary ba­ǵa­ly bolǵandyqtan, Afrıkadaǵy eń qymbat komanda atan­ǵan Kot-d’ Ivýar quramasymen ót­kiz­gen oıyn­da da qar­sylas qaqpanyń al­dyna qarbalas tý­dyrǵan osy Kaka. Alǵashqy sha­býyl­da odan dop al­ǵan Ro­bıno qaqpa­ny kóz­deı shirene tartqan. Dop mań­daı­shany jalap ótti. Oıynnyń 25-shi mınýtynda Lýıs Fa­­bıano Kot-d‘Ivýar qaqpasyna gol soq­ty. Qaıran Kaka jan-jaǵynan qaý­syr­malap qysqan qor­ǵaý­shylardyń ara­synan ınedeı sańlaý taýyp, ala dopty alǵa atylǵan Fabıa­nonyń aldyna saldy da berdi. Gol! 1:0. Qara marjan Dıde Drogbanyń júzi ókinishten kúreńitip ketti deıin desek, ótirik aıtqan bolar edik. Qaraqoshqyl óńinen sezim áseri árıne bilinbeıdi. Biraq, júreginiń qan jylaǵany anyq. Birinshi taım aıaqtalǵanda jerden bir shókim shópti topyraǵymen julyp alyp, mańdaıyna basty. Táý etti-aý. Kómektespedi. Yrymyn aıta­myz da. Birinen biri ótken brazı­lııalyqtar qarsylastar alańynan shyqpaı-aq qoıdy. Qaqpa aldyn­daǵy qarbalas. Bir qorǵaýshyny aldap ótip, ekeýiniń ústinen dop asyrǵan Fabıano áýelegen dopty keýdesimen qaǵyp, aıaǵyna týralap aldy da qaıqaıta tartty. Býbakar Barrı sozyla qarǵydy. Saýsaǵy­nyń ushtary tıip, shorshyǵan dop qaqpanyń buryshynda aýǵa túsken alabuǵadaı bulqyndy. 2:0. Bir ókinishtisi – Fatıano dopty qoly­­men yńǵaılap alǵan. Tóre­shiler baıqamady. Eýropanyń eń úzdik shabýyl­shysynyń biri Dıde Drogbanyń da gol soǵatyn múmkindigi boldy. Biraq, baspen urǵan doby qaqpadan sál qıys ketti. Aıyp alańynda jasyndaı jarq etken Kakanyń zeńbirekten atqan­daı ǵyp tepken dobyn Barrı qaq­shyp aldy. Sabazyń munymen de tyn­bady. Sol jaq qaptalda qaýma­la­ǵan úsh qorǵaýshyny tarydaı shashyp, sol Kaka qaqpa aldynan kóldeneńdetip taǵy bir pas jiberdi. Oǵan aldymen Elaný úlgerdi. 3:0!!! Biraq, álemdegi úzdik surmer­gen­niń biri  Drogbanyń qaırat kórsetpeı ketýi ádiletsizdik bolar edi. Jırvıno Kolo Týrege ádemi pas berdi. Osy sát­te Drogba lyp etip, qaqpaǵa qaraı ótti de ózine baǵyttalǵan dopty baspen uryp, qaqpaǵa kir­gi­zip jiberdi. Brazılııa­lyq qaqpa­shy ornynan qozǵalyp ta úlgergen joq. Oıynnyń sońǵy mınýttary júıkeni júndeı tútken. Shabýyl­shyny shalyp qulatqan Kaka sary qaǵaz aldy. Kot-d ıvýarlyq Tıote urynar­ǵa qara tappaı qoıdy. Sol aıqasqa kirgen jerden shý shyǵady áıteýir. Brazılııalyq oıynshyny shalyp jyǵyp, oınaqtap shyǵa kelgen Tıote qanǵalaqtap Kakanyń jany­na kelip qaldy. Sabyrynan asa tógile qoı­maıtyn syrbaz Kaka burylyp qara­maǵan kúıi shyn­taǵyn kóterip qaldy. Yńq ete qalǵan Tıote oıbaılap qulady. Tóreshi áýeli sary, sosyn qyzyl qaǵazdy kórsetti. Kaka alań­nan ketti. Kot-d ıvýarlyqtar kú­sheıdi. Dopty tolyq baqylaýlaryna aldy. Gol soǵýǵa nıettendi. Biraq, qoıannyń quıryǵyndaı sholtań ete qalǵan ýaqyt Drogba­nyń jigitteriniń nıetin quptama­­dy. Brazılııalyqtardyń bas bapkeri Dýnga óz jigitteriniń óz she­berligin qyzyqtap ketpeı, ujymdyq oıyn oınaǵanyna razy. Al, Kot-d Ivýardyń bapkeri, shved Erıksson áli de óz tobynan shyǵý­dan úmitin úzgen joq.. Baqtııar TAIJAN.