Senat depýtaty Amangeldi Tolamısov Jetisý oblysynyń Jarkent qalasynda bolyp, jergilikti turǵyndarmen jáne Halel Hamraev atyndaǵy orta mektep ujymymen kezdesti, dep habarlaıdy Egemen.kz.
Senattyń baspasóz qyzmeti usynǵan aqparatqa sáıkes, AES qurylysyn salý jáne onyń elimiz úshin artyqshylyǵy – talqylaýdyń negizgi taqyryby boldy. Senator elektr energııasyna zárýlik ósip kele jatqan qazirgi ýaqytta AES qurylysy elimizdi turaqty energııamen qamtamasyz etýdegi negizgi sheshim retinde qaralyp otyrǵanyn atap ótti.
«Atom elektr stansııasy –ekologııalyq eń taza jáne qaýipsiz energııa kóziniń biri. Onyń qurylysy kómirdi paıdalanýdy edáýir qysqartýǵa jáne qalalardaǵy aýa sapasyn jaqsartýǵa múmkindik beredi. Sonymen qatar, AES joǵary bilikti jumys oryndaryn ashady jáne ınjenerlerdiń, energetıkterdiń, ıadrolyq fızıkterdiń, qurylysshylardyń jáne basqa mamandar mansabynyń ósýine yqpal etedi», dep atap ótti Amangeldi Tolamısov.