Ortalyq referendým komıssııasynyń tóraǵasy Nurlan Ábdirov Qaraǵandy oblysy men Astana qalasynyń 6 qazan kúngi respýblıkalyq referendýmǵa daıyndyq barysyn tekserdi. Ol aldymen Qaraǵandy oblysynda keńes ótkizip, saılaý ýchaskelerinde boldy.
Qazir óńirde 650 ýchaskelik komıssııa jumys istep jatyr, olardyń quramynda 4 440 adam bar. Qaraǵandy oblysynda barlyǵy 761 604 saılaýshy tirkelgen, onyń 4 605-i – múgedektigi bar adamdar. Jergilikti bılik saılaý kúni olarǵa barlyq jaǵdaı jasalatynyn aıtty. Sondaı-aq turǵyndardy áleýmettik jeliler, messendjerler arqyly aqparattandyryp jatyr, arnaıy onlaın-servıster iske qosylǵan. 15 call-ortalyq ashylyp, 109 qyzmeti jumys isteıdi.
ORK tóraǵasy oblys ortalyǵyndaǵy №792 jáne №794 ýchaskelerinde bolyp, daıyndyq jumystarymen tanysty. Odan soń N.Ábdirov aýmaqtyq referendým komıssııalary tóraǵalary, quqyq qorǵaý, ózge de memlekettik organdar basshylarymen keńes ótkizdi. Onda aldaǵy naýqannyń negizgi erekshelikteri, referendým ótkizýge daıyndyq, sondaı-aq elektoraldyq úderisiniń barlyq kezeńinde ashyqtyqty qamtamasyz etý, zańdylyqty saqtaý máseleleri talqylandy.
Qaraǵandy oblysy ákiminiń orynbasary Álibek Áldeneı óńirde referendýmǵa qatysýǵa quqyǵy bar azamattardyń tizimi naqtylanyp jatqanyn jetkizdi. Oblys prokýrorynyń orynbasary Talǵat Muqashev elektoraldyq kezeńinde zańdylyqty saqtaý týraly baıandama jasasa, oblystyq Polısııa departamentiniń bastyǵy Negmet Ismaǵulov naýqan kezeńinde, daýys berý kúni quqyqtyq tártipti saqtaý jóninde esep berdi.
Sondaı-aq atqarylǵan jumystar legin Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova men Qaraǵandy oblysynyń ARK tóraǵasy Qaırat Núrkenov tizbektep shyqty.
Qaraǵandydan oralǵan soń, ORK tóraǵasy elordanyń ORK tóraǵasymen, Astana jáne qala aýdandarynyń ARK múshelerimen, memlekettik jáne quqyq qorǵaý organdarynyń ókilderimen keńes ótkizip, aldaǵy plebıssıtke daıyndyq boıynsha júrgizilip jatqan jumystardyń esepterin tyńdady.
N.Ábdirov keńes qatysýshylaryna respýblıkalyq referendým ótkizýge daıyndyqtyń zańnamalyq jańashyldyqtary men erekshelikterin túsindirdi. Ol referendým men saılaý zańnamasynyń normalaryn qatań saqtap, komıssııalardyń barlyq múshesin úzdiksiz ári sapaly oqytý qajet ekenin aıtty.
Qala ákiminiń orynbasary Eset Báıken referendýmǵa qatysýǵa quqyǵy bar azamattardyń tizimderi, referendýmdy uıymdastyrý, aqparattyq, materıaldyq-tehnıkalyq qamtamasyz etýde júrgizilip jatqan jumystar týraly baıandady. Astana qalasynyń Jumyspen qamtý jáne áleýmettik qorǵaý basqarmasynyń basshysy Ilıa Skýb múgedektigi bar adamdardyń saılaý quqyqtaryn iske asyrý týraly habardar etti.
Sondaı-aq qalalyq prokýratýra men polısııa departamenti basshylarynyń orynbasarlary esep berdi. Astana qalasynyń aýmaqtyq referendým komıssııasynyń tóraǵasy Beısembaı Jumabekov referendým komıssııalarynyń qyzmeti jáne daýys berý kúnine daıyndyq óz kezegimen júrip jatqanyn jetkizdi.
Eki óńirde de ORK basshysy daýys berý kúni jergilikti atqarýshy organdardyń elektr qýatymen ári ınternetpen úzdiksiz qamtamasyz etýge, al ishki ister organdarynyń ýchaskelerde jáne irgeles aýmaqtarda qoǵamdyq tártipti saqtaý mańyzdy ekenin aıtty. Sonymen qatar N.Ábdirov aýmaqtyq referendým komıssııalaryna turǵyndardy tolyq aqparattandyrýdy tapsyrdy jáne daýys beretin ýchaskelik komıssııa músheleri úılerdi aralap, jeke shaqyrý qaǵazdaryn úlestirý qajet ekenin atap ótti. Bul – mańyzdy istiń biri.
Buǵan qosa barǵan óńirlerde N.Ábdirov aýmaqtyq referendým komıssııalarynyń múshelerimen jeke keńester ótkizdi. Oǵan deıin ORK tóraǵasy elordanyń ár aýdanyndaǵy ýchaskelerge baryp, daýys berýge daıyndyq barysymen tanysqan edi. Ýchaskelerdi jaraqtandyrý jáne daýys berýshilerge qolaıly jaǵdaı jasap, múgedektigi bar adamdardyń saılaý quqy taptalmaýyn shegelep tapsyrdy.