AES salýdy qoldaý jónindegi Halyqtyq shtab músheleri Mańǵystaý oblysynda boldy. Olar munaıshylarmen, óńir jurtshylyǵy ókilderimen birqatar kezdesý ótkizip, Senek aýylynyń turǵyndarymen aımaqty damytý perspektıvalaryn talqylady, dep habarlaıdy Egemen.kz.
Aqtaýda Halyqtyq shtab músheleri «Mańǵystaýmunaıgaz» AQ qyzmetkerlerimen júzdesti. Is-sharaǵa 150-den astam adam qatysty. Áńgimelesý barysynda Memleket basshysy eńbek adamyna aıryqsha basymdyq beretini, olardyń arasynda el damýyna ólsheýsiz úles qosyp kele jatqan munaı-gaz salasynyń qyzmetkerleri oıyp turyp oryn alatyny erekshe atap ótildi. Sonymen qatar, Shtab músheleri Prezıdent bastamasymen Konstıtýsııaǵa túzetýler engizilgenin, soǵan sáıkes jer men onyń qoınaýyndaǵy qazba baılyq halyqqa tıesili ekenin eske saldy. Parlament depýtattary jer qoınaýyn paıdalaný týraly jańa zań qabyldady. Endi elimizde jańadan ashylǵan barlyq iri ken oryndary ulttyq kompanııalardyń 50% jáne odan joǵary úlesimen ıgerilýge tıis. Sondaı-aq, jer qoınaýyn paıdalanýshy barlyq kompanııa endi qazba baılyǵy azaıyp bara jatqan ken oryndarynda jumys júrgizýdi jalǵastyrýǵa nemese ornalasqan aımaqty damytýǵa qarajat quıýǵa mindetti. Sonyń nátıjesinde, «О́zenMunaıGaz» jáne «Mańǵystaýmunaıgaz» kompanııalarynda myńdaǵan jumys orny saqtalady.
«6 qazanda referendým ótetinin bilesizder. Prezıdent bıylǵy Joldaýynda AES salý boıynsha tańdaýdy halyqtyń ózi jasaýǵa tıis ekenin basa aıtty. Bul – Memleket basshysynyń buljymas ustanymy. Qazir eldegi eń mańyzdy sheshimderdiń barlyǵy da halyqtyń talqysyna salynady. Bul qoǵamda jańa saıası mádenıet qalyptasqanyn kórsetedi. Qazaqstannyń ár azamaty el taǵdyry aldyndaǵy jaýapkershilikti sezinýi qajet», dedi Májilis depýtaty, «AMANAT» partııasy fraksııasynyń jetekshisi Elnur Beısenbaev.
Sonymen qatar AES salýdy qoldaý jónindegi Halyqtyq shtab músheleri aımaqtaǵy eń ózekti máseleniń birine – aýyz sý tapshylyǵyna toqtaldy. Máselen, bıyl Fort-Shevchenkodaǵy sý tazartý qubyry stansııasynyń qurylysyn aıaqtaýǵa 2,5 mlrd teńge bólindi. Sondaı-aq 2025 jylǵa qaraı «Kendirli» kýrorttyq aımaǵynda jańa sý tushytý zaýyty salynady. «Kaspıı» sý tushytý zaýytyn keńeıtý jumysy jalǵasyp jatyr. Bul mańyzdy jobalar turaqty qýat kózin qajet etedi.
Senek aýylynda AES salýdy qoldaý jónindegi Halyqtyq shtab músheleri jergilikti turǵyndarmen óńirdegi ózekti máselelerdi talqylady. Iаǵnı, aýylda jańa jumys oryndaryn qurý, nesıe alý, jańa óndiris oryndaryn ashý jáne taǵy basqa. Memleket «Aýyl amanaty» baǵdarlamasy aıasynda aýyl turǵyndaryna jeke kásip ashý úshin 2,5%-dyq qomaqty qarajat bóledi.
Osy kúni AES salýdy qoldaý jónindegi Halyqtyq shtab músheleri Mańǵystaý oblysy jurtshylyǵynyń ókilderimen jáne óńirdegi belsendi azamattarmen kezdesti. Búginde atalǵan óńir eń joǵary júkteme kezinde shetelden elektr energııa satyp alady. Energııa tapshylyǵy jańa óndiris oryndaryn ashý, jańa jumys oryndaryn qurý, kommýnaldyq ınfraqurylymdy damytý jumysyn tejeıdi. Osy tapshylyqqa baılanysty kóptegen perspektıvaly óndirister tek qaǵaz júzinde qalýda. Shtab músheleri atap ótkendeı, búginde Mańǵystaýdy elimizdiń biryńǵaı energııa júıesine qosý jumysy júrgizilip jatyr.
Jalpy mańǵystaýlyqtar aldaǵy referendýmǵa belsendi qatysýǵa nıet bildirdi.