Senator Bekbolat Orynbekov Baızaq aýdanyndaǵy Sarykemer aýylynda mektep jumysymen, kópqabatty turǵyn úı jáne dene shynyqtyrý-saýyqtyrý kesheniniń qurylysymen tanysty, dep habarlaıdy Egemen.kz Senattyń baspasóz qyzmetine silteme jasap.
Bekbolat Orynbekov kezdesý barysynda AES Qazaqstanǵa energııa tapshylyǵy máselesin sheshýge kómektesetinin atap ótti. Onyń aıtýynsha, atom elektr stansııasy qorshaǵan ortaǵa zııan keltirmeı, halyqqa da, ónerkásipke de jetkilikti elektr energııasyn óndirýge qaýqarly.
Depýtat Qazaqstanǵa óz ýranyn paıdalaný syrttan ákelinetin shıkizatqa táýeldilikti azaıtatynyna toqtaldy. Atom elektr stansııasynyń qurylysy jańa jumys oryndaryn ashyp, joǵary tehnologııany damytýǵa yqpal etetinin de tilge tıek etti.
«Atom energetıkasy – Qazaqstannyń bolashaǵy úshin strategııalyq sheshim. Bul bizdi turaqty elektr qýatymen qamtamasyz etedi, bul ekonomıkalyq ósý men ál-aýqat úshin asa mańyzdy. Mundaı jaǵdaıda atom elektr stansııalary is júzinde kómirqyshqyl gazyn shyǵarmaıdy. Bul olardy ekologııalyq taza dep esepteýge múmkindik beredi. Atom elektr stansııasynyń qurylysy myńdaǵan jumys oryndaryn ashyp, ǵylymı zertteýler men tehnologııanyń jańa múmkindigin ashady. Qazaqstan energetıkalyq táýelsiz el bolý úshin óziniń ýran qoryn paıdalana alady. Bul barlyq azamattyń ıgiligine jaraıtyn turaqty damý men taza energııaǵa aparatyn jol», dedi Bekbolat Orynbekov.
Senator AES jobalaý jáne salý kezinde turǵyndardyń pikirleri eskeriletinin jáne sıfrlyq tehnologııalar men jasandy ıntellektti damytýǵa qajetti qosymsha energııany tek atom stansııasynyń qurylysy arqyly alýǵa bolatyndyǵyn jetkizdi.