Parlament Senatynyń Tóraǵasy Máýlen Áshimbaev bastaǵan AES salýdy qoldaý jónindegi halyq shtabynyń músheleri Jetisý oblysyna baryp, óńir jurtshylyǵymen aldaǵy referendýmǵa qatysty ózekti máselelerdi jáne energetıka salasyn damytý perspektıvalaryn talqylady. Sapar barysynda depýtattar sarapshylarmen jáne qoǵam qaıratkerlerimen birge oblystaǵy óndiristik kásiporyndardyń eńbek ujymdarymen, sondaı-aq belsendi jastarmen kezdesti, dep habarlaıdy Egemen.kz vedomstvonyń baspasóz qyzmetine silteme jasap.
Kezdesý barysynda Senat Tóraǵasy AES salý máselesine qatysty jalpyulttyq referendým «Halyq únine qulaq asatyn memleket» tujyrymdamasyn iske asyrýdyń jarqyn kórinisi ekenine nazar aýdardy. Sondaı-aq Palata Spıkeri bul bastamanyń strategııalyq sıpaty men el ekonomıkasyna tıgizer áserine toqtalyp, aldaǵy referendýmda árbir qazaqstandyqtyń daýysy mańyzdy ról atqaratynyn atap ótti.
«Prezıdentimiz Qasym-Jomart Kemeluly Toqaev 6 qazanda atom elektr stansasyn salý máselesine qatysty respýblıkalyq referendým ótkiziletinin jarııalady. Soǵan sáıkes biz ózderińizben atalǵan bastamany jáne jalpy energetıka salasyn damytý perspektıvalaryn talqylaý úshin arnaıy kelip turmyz. Osy aptada ótetin jalpyulttyq referendým Qazaqstannyń odan ári damýy jolynda strategııalyq mańyzǵa ıe. Sondyqtan bárimiz judyryqtaı jumylyp, elimizdiń jáne óskeleń urpaqtyń bolashaǵyna zor áserin tıgizetin mańyzdy sheshimdi birge qabyldaýymyz kerek. Osyǵan baılanysty barsha qazaqstandyqty referendýmǵa belsendi qatysyp, óz tańdaýlaryn jasaýǵa shaqyramyn», dedi Máýlen Áshimbaev.
Sonymen qatar Shtab músheleri aqparattyq jumys aıasynda kóp balaly analar, múmkindigi shekteýli jandar jáne áleýmettik az qamtylǵan sanattaǵy azamattar jumys isteıtin «Aısulý» tigin fabrıkasynyń ujymymen, sondaı-aq, qala qurylysymen aınalysatyn «Temirbeton» kásipornynyń qyzmetkerlerimen kezdesti.
Kezdesýler barysynda otandyq óndirýshilerdi qoldaý máseleleri, osy baǵyttaǵy zańnamalyq normalar jáne referendýmnyń mańyzy keńinen talqylandy. Is-sharalar kezinde eńbek ujymdary óz pikirlerin bildirip, atom elektr stansasynyń paıdasy men odan týyndaıtyn táýekelderge nazar aýdardy.
О́ńir turǵyndarymen jáne belsendi jastarmen kezdesýde óndiriske qajetti jańa tásilderdi zerdeleýdiń jáne ınnovasııalyq tehnologııalardy engizýdiń ıgilig sóz boldy.