Elbasy – Qazaqstan Respýblıkasynyń Prezıdenti N.Á.Nazarbaevtyń tapsyrýy boıynsha Memlekettik hatshy – Syrtqy ister mınıstri Q.Saýdabaev Qyrǵyz Respýblıkasy Ýaqytsha úkimetiniń basshysy R.Otýnbaevamen týysqan Qyrǵyzstan halqyna qajetti kómektiń kólemi men túr-túrleri boıynsha telefon arqyly kelissóz júrgizdi, dep habarlady QR SIM-iniń baspasóz qyzmeti.
Taraptar kórsetiletin kómektiń qaýipsizdigin, saqtalýyn jáne onyń tikeleı muqtaj bolyp otyrǵan Qyrǵyzstan azamattaryna jetkizilýin tolyq qamtamasyz etýge basa nazar aýdardy.
Qyrǵyz Respýblıkasy Ýaqytsha úkimetiniń jetekshisi osynaý qıyn kezeńde turaqty da dáıekti qoldaýy úshin Qazaqstan Prezıdentine rızashylyǵyn bildirip, búgin qajet bolyp otyrǵan kómek jáne ony muqtajdarǵa jetkizýdiń túri jónindegi óz usynystaryn joldaıtynyn málimdedi.
Sonymen qatar, R.Otýnbaeva EQYU-nyń Is basyndaǵy tóraǵasyn tutastaı Qyrǵyzstandaǵy jáne atap aıtqanda, Osh qalasyndaǵy ahýal týraly habardar etip, óziniń jýyrda ǵana sol jaqtan kelgenin aıtty. Ol belgili dárejede shıelenistiń bar ekenin, tutastaı alǵanda, úlken qaýip-qater men problema saqtalyp otyrǵanyn jetkizdi.
Osyǵan baılanysty taraptar 27 maýsymǵa belgilengen referendýmdy ótkizý úshin barynsha qolaıly jaǵdaılar týǵyzý qajettigin atap kórsetti.
Q.Saýdabaev daǵdarystyń alǵashqy kúninen bastap kórshi respýblıkaǵa jan-jaqty kómek kórsetip kele jatqan Qazaqstan Prezıdentiniń EQYU-ǵa tóraǵalyq etýshi Memlekettiń basshysy retinde budan bylaı da eki jaqty negizde týysqan Qyrǵyzstan halqynyń osynaý aýyr daǵdarystan shyǵýy úshin qajetti kómek kórsete berý nıetinde ekenin qadap aıtty.