Mańǵystaýda zańǵar jazýshy, kórnekti memleket jáne qoǵam qaıratkeri Ábish Kekilbaevtyń 85 jyldyǵyna arnalǵan is-sharalar jalǵasyn taýyp jatyr. Aýqymdy ǵylymı-praktıkalyq konferensııa aıasynda shymyldyǵy ashylǵan «Abish alemi» III halyqaralyq teatr festıvali óz máresine jetti.
Tórt kún boıy teatr sahnasynda ulttyq jáne álemdik úzdik shyǵarmalar sahnalanyp, dáýirler shejiresin jetkizdi. Festıvalǵa Grýzııa, Iran, Tatarstan, Qyrǵyz memleketterimen qatar Qazaqstannan barlyǵy 8 teatrdan 200-ge jýyq sahna sheberi óner kórsetip, Mańǵystaý jurtshylyǵynyń yqylasyna bólendi.
«Abish alemi» III halyqaralyq teatr festıvaliniń saraptamalyq keńes músheleri qatarynda Qazaqstannyń halyq ártisi Asanáli Áshimov, M.Áýezov atyndaǵy Qazaq ulttyq akademııalyq drama teatrynyń dırektory, teatr synshysy Erkin Jýasbek, teatrtanýshy, ónertaný kandıdaty, Qazaq ulttyq óner akademııasynyń teatrtaný fakýltetiniń professory Baqyt Kákıqyzy, teatrtanýshy, teatr synshysy, ónertaný kandıdaty Aısulý Saǵıtova, Túrkııadan kelgen rejısser Bırkan Gúrgón tórelik etti. Sonymen qatar TÚRKSOI bas hatshysy Sultan Raev, Asanáli Áshimov atyndaǵy «О́ner men mádenıetti qoldaý» qorynyń tóraıymy Baǵdat Áshimova, «Qurmet» ordeniniń ıegeri, jazýshy Jabal Erǵalıev, Ábish Kekilbaevtyń otbasy músheleri, Qazaqstannyń eńbek sińirgen qaıratkeri Nurnııaz Muhanov festıval keńesshisi retinde qatysty.
– Spektaklderdi tamashalaı otyryp, esimi HH ǵasyrdaǵy eń úzdik júz jazýshynyń qataryna engen qarymdy qalamgerdiń shoqtyqty shyǵarmalaryn ınssenırovkalap, ózge tilderge aýdaryp, teatrlar repertýaryna engizýde, kınoekranǵa shyǵarýda alda úlken mindetter turǵanyn uqtyq. Osy oraıda qalamgerdiń «Shyńyraý», «Kúı», «Bir shókim bult», taǵy da basqa prozalyq týyndylaryn sahnaǵa laıyqtap, kórermen yqylasyna bólenip júrgen Jantórın atyndaǵy teatr ujymynyń eńbegin atap kórsetkim keledi. Eger biz oblystyq mýzeıdi Ábekeń shańyraǵynyń shyraqshysy desek, N.Jantórın teatryn Ábekeń shyǵarmalarynyń joqshysy men jarshysy deýge tolyq negiz bar. Dańqty sóz sheberi, kemeńger memleket qaıratkeriniń 85 jyldyǵyn atap ótý jazýshynyń týǵan kúni qarsańynda elordadaǵy merekelik is-sharalarmen qorytyndylanady.
Jantórındikter Ábekeńniń ózderi sahnalaǵan tórt shyǵarmasymen osy is-sharaǵa qatysýǵa shaqyrtý alyp otyrǵany – bárimiz úshin mártebe. Jazýshynyń rýhanı murasy halqymen birge jasaı beredi, – dedi Mańǵystaý oblystyq mádenıet, tilderdi damytý jáne arhıv isi basqarmasynyń basshysy Nurtas Salı.
Sarapshylar sheshimimen irikteý kezeńinen ótken Iran, Tatarstan, Qyrǵyzstan, Grýzııa eliniń teatrlary jáne Qazaqstannyń Astana, Almaty, Kókshetaý jáne Oral qalalarynan qatysýshy teatrlar «Úzdik teatr» atalymymen marapattaldy. Sondaı-aq «Abish alemi» teatr festıvaliniń «Úzdik epızodtyq beınesi» arnaıy júldesimen «Ne plach, kogda ıa ýmrý» spektaklindegi Mıkaıl róli úshin Grýzııa Respýblıkasynyń Geıdar Alıev atyndaǵy Tbılısı azerbaıjan kásibı Memlekettik drama teatrynyń ártisi Torǵaı Valızade, «Úzdik ekinshi plandaǵy er adam beınesi» arnaıy júldesimen «Elektra» spektaklindegi Agamennon róli úshin Jalal Shahbaznezad (Iran teatry), «Úzdik ekinshi plandaǵy áıel adam beınesi» arnaıy júldesimen Shyńǵys Aıtmatovtyń «Ǵasyrdan da uzaq kún» romany boıynsha «Man» spektaklindegi Naıman ana róli úshin Anarbaeva Jyldyz (Qyrǵyz Respýblıkasy), «Úzdik er adam beınesi» júldesimen «Lıýbısh, ne lıýbısh» spektaklindegi Shal róli úshin Tatarstan Respýblıkasynyń halyq ártisi H.Hammatýllın, «Úzdik áıel adam beınesi» júldesimen «Qaraly sulý» spektaklindegi Qaragóz róli úshin Batys Qazaqstan oblysynan kelgen ártis H.Shamelova, «Úzdik rejıssýra» júldesimen «Stansıonnyı smotrıtel» spektakli úshin kókshetaýlyq T.Kýlov, «Úzdik akterlik ansambl» júldesimen Almaty qalasynan kelgen «Ierma» spektakli, «Úzdik spektakl» júldesimen «Stansıonnyı smotrıtel» kókshetaýlyq spektakli marapattaldy. Sondaı-aq TÚRKSOI halyqaralyq uıymynyń Bas hatshysy Sultan Raev III halyqaralyq «Abish alemi» teatr festıvaline qoldaý bildirip, birneshe márte uıymdastyrýǵa múmkindik bergeni úshin Mańǵystaý oblysynyń ákimdigin jáne teatr salasynyń birneshe mamanyn TÚRKSOI halyqaralyq uıymynyń Alǵyshatymen jáne tósbelgisimen marapattady.
«Jaqsynyń sharapaty elge tıedi» degendeı, aramyzda bolmaǵanymen, shyǵarmalary arqyly halqynyń júregine jol tapqan jazýshy ǵumyry máńgi.
Mańǵystaý oblysy