El ishindegi mádenıet salasyndaǵy mándi sharýa «Aýyl – el besigi» baǵdarlamasy arqyly atqarylyp, rýhanı álem nurlana tústi. Bıyl aýdandyq mádenıet nysandarynyń ınfraqurylymyn damytýǵa 7,1 mıllıard teńge bólinip otyr.
Kólemdi qarajattyń 4,5 mıllıard teńgesine 8 mádenıet nysanyn salý kózdelgen. 2,2 mıllıard teńgege mádenıet oshaqtarynyń bireýine kúrdeli, tórteýine aǵymdaǵy jóndeý jumysy júrgizilip jatyr. Osylaısha, jalpaq jurttyń suranysy ótelip, mádenıet salasy jańa serpinge ıe boldy. Sál ǵana taratyp aıtatyn bolsaq, búgingi kúni Birjan sal aýdanynyń Úlgi aýylyndaǵy mádenıet úıine 135 mıllıon teńgege jóndeý jumysy júrgizildi. Etek-jeńi keń pishilgen aýyl turǵyndary qazir beınelep aıtqanda, qurylysshynyń qalaǵynan jańa shyqqandaı kóz tartarlyq keıippen syńǵyrlap turǵan, muqııat jóndeýden ótkizilgen mádenıet úıiniń ıgiligin kóredi. Aýdanda issaparda bolǵanymyzda el aǵalarynyń sharapatty sharýaǵa, memlekettiń qamqorlyǵyna aıtqan aq alǵysyna kýá boldyq. Jóndeýden ótkizilgen selolyq mádenıet úıinde ártúrli úıirme jumys isteıdi. Aýyl jastary mádenıet oshaǵyna kelip, ózderiniń qalaýlary boıynsha rýhanı nár alady.
Osyndaı ıgilikti is Jaqsy aýdanynyń Zaporoje aýylynda da júzege asyrylyp otyr. Oqtaı túzý kósheleri asfalt jamylǵymen kómkerilgen, seloǵa kireberiste uqypty qoldyń taby anyq baıqalatyn demalys parkin janaı ótseńiz, eldi mekenniń qaq ortasynda eńseli selolyq klýb menmundalaıdy. Bul aýylda áleýmettik-turmystyq jaǵdaıǵa aıryqsha mán berilgen. О́tpeli kezeńniń ókpek jeli berekeli aýyldy aınalyp ótkendeı. Aýyl jastarynyń kópshiligi týǵan jeriniń tósinde abyroıly eńbek etip jatyr. Mine, osyndaı ádemi kóriniske qarap turyp, tórt qubylasy saı bolsa, eldiń irgesi sógilmeıtinin baıqaýǵa bolady. Ústimizdegi jyly aýyldaǵy selolyq mádenıet úıi 87,3 mıllıon teńgege jóndeldi. Keıingi jyldary máselesi qaıta-qaıta kóterilgen Býrabaı aýdanyndaǵy Zelenyı Bor aýylyndaǵy mádenıet úıi 432,3 mıllıon teńgege jóndelip, turǵyndar úshin aq túıeniń qarny jarylǵan sát týdy. Kópten beri júdep turatyn, baǵdarlamasynyń arqasynda saltanatty kúıge enip, kóz tartarlyq keıipke endi. Dál osyndaı aǵymdaǵy jóndeý jumystary Qorǵaljyn, Zerendi aýdandaryndaǵy Aqan jáne Prırechnoe aýyldarynda júzege asyrylsa, Birjan sal aýdanyndaǵy Birsýat aýylynyń turǵyndary da utymdy istiń ıgiligin kórip otyr.
О́ńirde alty eldi mekenniń kitaphanalaryna kúrdeli jóndeý júrgizildi. Atap aıtatyn bolsaq, Atbasar aýdanyndaǵy Aqan Qurmanov atyndaǵy, Ereımentaý aýdanyndaǵy Eginshilik aýyldaryndaǵy jáne Jarqaıyń aýdandyq kitaphanalaryna júrgizilip jatqan jóndeý jumystary taıaýda aıaqtalmaq.
Arshaly aýdanynda baǵdarlama aıasynda eki ǵımarat salynyp jatyr. Atap aıtqanda, Arshaly kentinde jáne Jibek joly aýylynda zamanaýı mádenıet úıleri boı kóterip, halyqqa qyzmet etetin bolady. Bul maqsatqa 1,4 mıllıard teńge qarjy bólingen. Bulandy aýdanyndaǵy Nıkolskoe jáne Voznesenka, Astrahan aýdanyndaǵy Novocherkasskoe aýyldaryndaǵy mádenıet úıleriniń qurylysy júrgizilýde. Bul maqsatqa 1,7 mıllıard teńge qarastyrylǵan.
Jyl sońyna deıin eki ınvestısııalyq jobany aıaqtaý josparlanǵan. Shýchınsk qalasyndaǵy 400 oryndyq aýdandyq mádenıet úıiniń qurylysyna 1 mıllıard teńge, Stepnogorsk qalasynyń irgesindegi Qarabulaq aýylyndaǵy salynyp jatqan mádenıet úıiniń qurylysyna 292,5 mıllıon teńge bólingen. Aqkól aýdanyndaǵy Azat eldi mekeninde jalpy quny 200 mıllıon teńge bolatyn mádenı sport kesheniniń qurylysy bastaldy.
О́ńirdegi mádenıet salasynyń óńin kirgizgen baǵdarlama berekeli sharýaǵa aınalyp otyr.
Aqmola oblysy