«Qazaqmys» kompanııalar tobyna qarasty «Saıaq-3» shahtasynda eki kenshi kóz jumdy. Bul týraly kompanııanyń baspasóz qyzmeti habarlady, dep jazady Egemen.kz.
Marqum bolǵan kenshiler kómirtegi gazynan ýlanǵan. Sonymen qatar kompanııanyń taǵy bir qyzmetkeri aýrýhanaǵa jetkizilgen.
Jazataıym oqıǵanyń mán-jaıyn anyqtaý úshin arnaıy komıssııa quryldy.
«Barlyq qyzmetkerlerdi jedel evakýasııalaý júrgizildi. Zardap shekkender jaqyn mańdaǵy medısınalyq mekemelerge jetkizildi. О́kinishke qaraı, eki qyzmetker qaıtys boldy», delingen «Qazaqmys» málimdemesinde.
Kompanııa qaza bolǵan kenshilerdiń otbasyna tıisti kómek kórsetiletinin habarlady.
Al oblystyq polısııa basqarmasy qaıǵyly oqıǵaǵa qatysty qylmystyq is qozǵady.
«Saıaq-3» shahtasynda bolǵan oqıǵaǵa baılanysty Qazaqstan Respýblıkasy Qylmystyq kodeksiniń 277 babynyń 2 tarmaǵyna sáıkes, ıaǵnı abaısyzda adam ólimine nemese ózge de aýyr zardaptarǵa ákep soqqan taý-ken nemese qurylys jumystaryn júrgizý kezinde qaýipsizdik qaǵıdalaryn buzý deregi boıynsha qylmystyq is qozǵaldy. Qazirgi ýaqytta polısııa qyzmetkerleri oqıǵanyń mán-jaıyn anyqtaý boıynsha keshendi tergeý áreketterin júrgizip jatyr», dep habarlady Qaraǵandy oblysy PD baspasóz qyzmeti.