Qostanaı oblysynyń turǵyndary 720 referendým ýchaskesinde daýys berdi. Ár ýchaskeniń basynda «Amanat» partııasy men «Daýys» qoǵamdyq baıqaýshylar koalısııasynyń baıqaýshylary daýys berýdiń zań aıasynda bolýyn qalt etpeı qadaǵalap otyrdy. Bul kúni naýqanǵa «Daýys» koalısııasynyń 1 440 baıqaýshysy atsalysqanyn aıta ketý kerek.
Sol kúni tańerteń Qostanaıdaǵy №11 ýchaskege baryp, óz tańdaýymyzdy jasadyq. Atalǵan ýchaskege tirkelgen 2 568 adamnyń aldy bolyp zeınetker Úmit Ismaıylova daýys berdi.
«Bul – asa mańyzdy ári tarıhı kún. Biz referendým bolsyn, saılaý bolsyn, erte kelip daýys berýge ádettengenbiz. Birinshi bolyp kelip, kóterińki kóńil kúımen úıge qaıtyp baramyz. Bala-shaǵamyzdyń erteńi jarqyn bolsa eken dep tileımiz. Sol úshin daýys berip, óz tańdaýymyzdy jasadyq. Eń bastysy, elimiz aman, irgemiz bútin bolyp, kez kelgen máseleni aqyl-parasat bezbenine salyp, baıyppen sheshken durys. Referendým da osy maqsatta uıymdastyrylyp otyr dep oılaımyn», deıdi eki nemeresin erte kelgen Úmit ájeı.
Túske taman №860 ýchaskege bas suǵyp edik, halyq qarasy kóp eken. Munda 2 408 adam tirkelgen. Sonyń 40 paıyzǵa jýyǵy óz tańdaýyn jasap úlgeripti.
«Halyq belsendi daýys berip jatyr. Referendýmǵa qatysýshylar úshin ystyq shaı, medpýnkt uıymdastyryp qoıdyq. Bizden bólek, eki baqylaýshy jumys istep jatyr», dedi ýchaske tóraǵasy Qanat Aımuhamedov.
Bul ýchaskede kóppen birge Elýbaı О́mirzaqov atyndaǵy oblystyq fılarmonııa dırektorynyń orynbasary Baǵdat Ospanov daýys berip jatyr eken.
«Referendýmǵa Qazaqstannyń azamaty, osy eldiń patrıoty retinde óz daýsymdy berý úshin keldim. Ýchaskege kirip kelgende halyqtyń aǵylyp jatqanyn kózim shaldy. Bul halyqtyń el bolashaǵyna beıjaı qaramaıtynyn bildiredi. О́tip jatqan referendýmdy eldegi demokratııalyq úderisterdiń jańa bir kórinisi dep esepteımin. Qazaqstannyń damýyna oń septigin bermese, eshqandaı zııany bolmaıtynyna senimim kámil», dedi B.Ospanov.
Qostanaı oblysy