Jańaózen qalasy turǵyndaryn jumyspen qamtý úshin jumys oryndaryn ashý mańyzdy. Sorǵy-kompressorlyq qubyrlar men sorǵy shtangalaryn óndiretin zaýytty Jańaózennen salý bir jaǵy jumyssyzdyq máselesin eńserýge sep bolsa, ekinshiden munaıly qaladaǵy óndiriske qajetti jabdyqtardy alystan arbalamaı, óz qalasy aýmaǵynan aldyrýǵa múmkindik beredi.
Zaýyt qurylysy jaýapkershiligi, ıaǵnı tapsyrys berýshi mindeti «Qaskor Injınırıng» JShS quzyrynda. Bul qurylym munaı-gaz kásiporyndarynyń qajettilikterine arnap munaı kásipshiligi men hımııalyq jabdyqtardyń tutas jelisin shyǵarady. Mańǵystaý oblysynyń jetekshi mashına jasaý kásiporyndarynyń biri retinde tanymal. Kompanııa oqshaýlaý baǵdarlamasy aıasynda 2023 jyly sorǵy-kompressorlyq qubyrlar men sorǵy shtangalary óndirisin Jańaózen qalasynda zaýyt salyp, kóshirýge sheshim qabyldaǵan. 34 jyl ótili bar, onyń ishinde sorǵy shtangalaryn óndirýde 2 jyl, pesh daıyndaýda 16 jyl jáne sorǵy-kompressorlyq qubyrlar óndirýde 9 jyl tájirıbesi bar kompanııa jańa zaýytqa 17,3 mlrd teńge ınvestısııa tartyp otyr. Zaýytqa 300-ge jýyq qala turǵynyn tartý josparlanǵan.
Qazir munaıly qaladaǵy №1 óndiristik aımaqta jalpy aýdany 12 gektar qurylys aýmaǵynda zaýyt qurylysy bastalǵan. Qurylysqa qajetti barlyq ınfraqurylymdyq jabdyqtaý men jetkizýlerdiń der kezinde júzege asyrylýy nátıjesinde bas merdiger «M-StroıTrans» JShS kompanııasynyń jumysshylary baqylap-ótkizý pýnkti, ashana, 150 oryndyq jataqhana, turmystyq qyzmet kórsetýge arnalǵan modýldik ǵımarattaryn montajdap, zaýyt baǵanalaryn tolyqtaı turǵyzyp úlgeripti.
«Zaýyt qurylysynyń daıyndyq jumysy, ınfraqurylym jetkizý bıyl sáýir aıynda bastaldy. Qurylys aýmaǵynda qazir «ASM», «Otan-ınjınırıng» atty eki kompanııa merdigerlik jumys júrgizip jatyr. Jumysty josparlanǵan merzimde aıaqtaý mindetimiz, sol sebepti baqylap-ótkizý pýnkti, ashana, jataqhana, turmystyq qyzmet kórsetýge arnalǵan modýldik ǵımarattaryn bıyl qyrkúıek aıynyń sońyna taman aıaqtaımyz dep otyrmyz. Ol nysandardyń qurylys materıaldary tolyqtaı kelip, daıyn tur», deıdi «M-StroıTrans» JShS kompanııasynyń ýchaske basshysy Jeńis Týkaev.
Qurylys alańynda alyp tehnıkalyq kólikter yńyrsı qozǵalyp, aýyr temir qondyrǵylardy tiktep turǵyzyp jatyr. Bir kúnde bir brıgada 10 temir baǵanany turǵyzyp úlgeredi eken. Al josparlanǵan tórt brıgada jınaqtalyp, tolyq iske kirisken kezde jumystyń qarqyn ala túseri anyq. Mańǵystaýdyń jeli men shańy qurylys alańynyń astan-kestenin shyǵaryp alasuryp-aq jatyr, biraq qurysh bilekti qurylysshy jigitter alańda ári aýyr jumyspen, ári jel-shańmen jaǵalasyp qyzý eńbekke kirisken.
Mańǵystaý oblysy