QR Densaýlyq saqtaý mınıstrligi qujat aınalymyndaǵy dári-dármek pen medısınalyq buıymdar baǵasynyń alshaqtaý faktilerin avtomatty túrde anyqtaý úshin óziniń aqparattyq júıelerin ońtaılandyrdy. Bul jumys Joǵary aýdıtorlyq palatanyń nusqamasy boıynsha júrgizilgen, dep habarlaıdy Egemen.kz.
Shilde aıynda Densaýlyq saqtaý mınıstrligi men onyń vedomstvolyq baǵynysty uıymdarynyń dári-dármekpen jáne medısınalyq buıymdarmen qamtamasyz etý tıimdiligine júrgizilgen memlekettik aýdıt aıaqtalǵan.
Nátıjesinde, aýdıtorlar shekti baǵalardy tirkeý kezindegi málimet pen QR aýmaǵyna ákelý kezindegi ilespe qujattardaǵy naqty baǵalar arasyndaǵy dárilik zattar qunyndaǵy alshaqtyq faktilerin anyqtaǵan. Osyǵan baılanysty vedomstvoǵa mundaı jaǵdaılardy avtomatty túrde tirkeý jóninde sharalar qabyldaý tapsyrylǵan.
«Búgingi tańda Dárilik zattar men medısınalyq buıymdardy saraptaý ulttyq ortalyǵy «Referenttik baǵa belgileý» jáne «Qaýipsizdik pen sapany baǵalaý» aqparattyq júıelerin ońtaılandyrdy. Bul dári-dármekke shekti baǵa belgileýge baqylaýdy edáýir kúsheıtedi jáne jeńildetedi», delingen habarlamada.