Ishki ister mınıstrligi qazan aıy bastalǵaly beri el aýmaǵyndaǵy esirtki aınalymyna qatysty 54 qylmystyń jolyn kesti, dep jazady Egemen.kz.
Mınıstrlik mamandary tárkilegen esirtkiniń jalpy salmaǵy 250 keliden asqan.
Onyń ishinde esirtki satýdyń - 29, asa iri mólsherde saqtaýdyń - 7, kontrabanda jáne quramynda esirtki bar ósimdikterdi ósirýdiń 7 oqıǵasy tirkelgen.
Esirkimen kúres sharalary barysynda Almaty oblysynda esirtki zerthanasy anyqtalyp, 35 jastaǵy er adam ustalǵan.
Ekibastuzda da sıntetıkalyq esirtki óndiretin zerthana joıylǵan. Eki jergilikti turǵyn kýrerlerdi tarta otyryp, esirtkini ınternet arqyly satýdy josparlaǵan.
«Al Astanada esirtkini jarnamalaıtyn QR-kodtary bar stıkerlerdi japsyrýmen aınalysqan 27 jastaǵy áıel ustaldy. Aqmola oblysynda esirtkini óz úıinde jáne jalǵa alynǵan jertólede saqtaǵan 54 jastaǵy er adamnyń da zańsyz áreketine tosqaýyl qoıyldy. Odan 34 kg marıhýana jáne 2 kg gashısh tárkilendi. Atyraýda 38 jastaǵy er adam men 28 jastaǵy áıel ustaldy. Olardan sıntetıkalyq esirtki salynǵan 81 oram tabyldy. Qostanaı oblysynda 25 sıntetıka oramy bar 16 jastaǵy stýdent ustaldy», dedi IIM resmı ókili Shyńǵys Álekeshev.