Túrkııanyń Ulttyq bilim mınıstrligi tarıh pánine túbegeıli ózgerister engizilgenin, endi «Ortalyq Azııa» termıniniń ornyna «Túrkistan» ataýy qoldanylatynyn habarlady. Bilim salasyndaǵy sarapshylar mundaı qadam bolashaq urpaqtyń túrkilik rýhty, otanshyldyqty sezinip tárbıelenýine baǵyttalǵanyn málimdedi.
Túrkııa Prezıdenti Rejep Taııp Erdoǵan «Túrik ǵasyry» baǵdarlamasy aıasynda túrki áleminiń bereke-birligin, jasampazdyǵyn, meımandostyǵyn aıqyndaı otyryp, «Túrki dáýirin» jalǵastyrýǵa nıetti ekenin jarııalady.
«Túrkııa Respýblıkasy retinde biz búkil Túrki áleminiń beıbitshiligine, órkendeýine ári qaýipsizdigine qadam jasaýdy jalǵastyramyz. Biz «Túrik ǵasyry» týraly kózqarasymyzdy Túrki Memleketteriniń Uıymynda keńeıte otyryp, aldaǵy kezeńdi túrki dáýirine aınaldyrý úshin ıyq tirese jumys isteımiz», dedi ol.
Túrik tarıhshylary Ahmet Tashaǵyl men Ramın Sadyk «TRT Haber» arnasyna bergen suhbatynda «Túrkistan» uǵymynyń tarıhı mánin túsindirip berdi.
«Túrkilerdiń otany degen maǵynany bildiretin «Túrkistan» sózi tarıhtyń alǵashqy kezeńderinen beri qoldanylyp keledi. XIX-ǵasyrdyń ekinshi jartysyndaǵy shapqynshylyqtan soń Túrkistan ataýy Ortalyq Azııa uǵymymen almastyrylyp, keńinen qoldanyla bastady», dedi A.Tashaǵyl.
Al Ramın Sadyk Túrkistan tujyrymdamasy jónindegi kózqarasty Ulttyq bilim mınıstrliginiń oqýlyqtarǵa engizýi óte durys sheshim ekenin atap ótti.
«Túrkııa da, Túrkistan da negizinen túrkiler turatyn aımaqty bildiredi. Biz tarıhymyzǵa, mádenıetimizge, ótkenimizge qamqorlyq jasaýymyz kerek», dedi tarıhshy.
Ramın Sadyk túrki álemi úshin ortaq tarıh, geografııa, ádebıet, kartalar men álipbıdi qurý jónindegi belsendi jumys aıasynda Ulttyq bilim mınıstrliginiń «Túrkistan» termınin oqýlyqtarǵa engizýi eleýli ózgeris ekenin alǵa tartty. Onyń aıtýynsha, bul transformasııa – tek Túrkııaǵa ǵana emes, búkil túrki álemine, sondaı-aq túrki memleketteriniń áriptes elderine mańyzdy bastama jáne qundy úles.
Osylaısha, Túrkııanyń Ulttyq bilim mınıstrligi Uly Túrkistannyń tarıhı dańqyn qaıtarýǵa zor qadam jasap otyr.