«Azamattarǵa arnalǵan úkimet» memlekettik korporasııasy júrgizýshi kýáligine teorııalyq emtıhan tapsyrý júıesine ózgeris engiziletinin habarlady, dep jazady Egemen.kz.
Endi júrgizýshi kýáligine úmitkerler eki faktorly aýtentıfıkasııadan (tekserýden) ótedi.
Eki faktorly tekserý – qoldanýshynyń eki túrli ádispen ózin-ózi rastaýy. Rastaý ádisi birinshi SMS habarlamanyń kómegimen, ekinshisi – bıometrııalyq sáıkestendirý arqyly júzege asyrylady.
Testileý bastalar aldynda qyzmetti alýshyǵa 1414 nómirinen jeke derekterge qol jetkizýge suraý salatyn habarlama jiberedi. Habarlama SMS qoldanýshynyń elektrondyq úkimet portalynyń jeke kabınetine tirkelgen telefon nómirine joldanady.
Avtorızasııa sátti ótkennen keıin qyzmet alýshy bıometrııalyq sáıkestendirýden ótýi kerek.
«Alaıaqtar kún saıyn aldaýdyń jańa tásilderin oılap taýyp jatyr. Osy oraıda bizdiń qyzmetkerlerimiz de zańbuzýshylyqtardy anyqtaý úshin úlken jumystar atqarýda. Sonymen qatar, Memlekettik korporasııa qyzmet kórsetýdiń sapasyn jaqsartý boıynsha turaqty jumys júrgizip keledi. Endigi kezekte, eki faktorly aýtentıfıkasııany engizý emtıhandaǵy buzýshylyqtardyń sanyn azaıtýǵa kómektesedi. Qyzmet alýshynyń derekteri de senimdi qorǵalady», dedi Memlekettik korporasııanyń Basqarma Tóraǵasy Arman Kenjeǵalıev.
Aıta keteıik, jańa bastama 11 qazannan bastap ázirge Astana qalasynda ǵana engiziledi. Al elimizdiń basqa óńirindegi mamandandyrylǵan HQKO-da eki faktorly aýtentıfıkasııany jyl sońyna deıin engizý josparlanǵan.