Bul týraly Ortalyq kommýnıkasııalar qyzmetinde ótken brıfıngte Densaýlyq saqtaý mınıstrliginiń Ana men bala densaýlyǵyn saqtaý departamentiniń dırektory Maǵrıpa Embergenova aıtty, dep habarlaıdy Egemen.kz.
«Demografııalyq jaǵdaıdy jaqsartý úshin 2021 jyldan bastap Memleket basshysynyń tapsyrmasy boıynsha Qazaqstanda «Ańsaǵan Sábı» baǵdarlamasy júzege asyrylyp jatyr. Onyń aıasynda kópten kútken 8 myńǵa jýyq sábı dúnıege keldi», dedi Maǵrıpa Embergenova.
Embergenovanyń aıtýynsha, sondaı-aq áıelder densaýlyǵyn jaqsartý, medısınalyq tekserýlermen, prenataldyq daıyndyqpen jáne kontrasepsııamen qamtýdy arttyrý maqsatynda «Analar saýlyǵy» baǵdarlamasy da júzege asyrylyp jatyr.
«Sonymen qatar Qazaqstanda alǵash ret halyqaralyq usynystardy eskere otyryp, júktilikke daıyndyqtyń klınıkalyq hattamasy bekitildi», dedi ol.