QR Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev AQSh Saýda palatasymen, sondaı-aq Meta jáne Apple sııaqty iri amerıkalyq kompanııalardyń ókilderimen birqatar kezdesý ótkizdi, dep habarlaıdy Egemen.kz mınıstrliktiń baspasóz qyzmetine silteme jasap.
Kezdesýlerde málimetter qaýipsizdigi, jalǵan akkaýnttarmen kúres jáne paıdalanýshylardy qorǵaýǵa qatysty mańyzdy máseleler talqylanǵan.
«Biz sondaı-aq Telegram platformasymen zańsyz kontentti jedel joıý jáne destrýktıvti arnalardy buǵattaý boıynsha belsendi túrde yntymaqtastyq ornatyp jatyrmyz. Bizdiń zańnamaǵa sáıkes, endi Telegram, WhatsApp jáne TikTok sııaqty ınternet-platformalar Qazaqstanda óz ókilin taǵaıyndaýǵa mindetti. Telegram-men olardyń ókilin taǵaıyndaý jáne keńse ashý týraly kelisimge qol jetkizildi, bul - kontentti baqylaýdy arttyrýǵa baǵyttalǵan mańyzdy qadam», dedi Jaslan Mádıev.
Sonymen qatar mınıstrlik Meta kompanııasymen alaıaqtyq shemalarǵa qarsy kúres jumystaryn bastaýdy josparlaǵan. Meta ókilderi Qazaqstanda jıilegen kıber-alaıaqtyq kóptegen el úshin ortaq problema ekenin atap ótti. Sońǵy toqsanda Meta jasandy ıntellekt tehnologııalaryn paıdalana otyryp, álem boıynsha 1,2 mıllıard jalǵan akkaýntty buǵattaǵan.