Sońǵy jyldary Jetisý oblysy aýyldarynda medısına, bilim, sport salalaryna arnalǵan birneshe nysan boı kóterdi. Jaqynda Sarqan aýdanyna qarasty Almaly aýylynda «Aýyl – el besigi» baǵdarlamasy aıasynda zamanaýı sport kesheni iske qosyldy. Shalǵaıda jatqan eldi mekende mundaı eńseli ǵımarat buryn bolmaǵan.
Aýyldan chempıondar shyǵaramyz desek, osyndaı sport nysandarynyń kóptep ashylýy mańyzdy. Jetisý oblysy qurylǵaly ondaǵan sport kesheni boı kótergen. Onyń basym bóligi aýyldarda ornalasqan. Oblys ákimi Beıbit Isabaev aýyl halqynyń áleýmettik deńgeıin ǵana kóterip qoımaı, sport, bilim salasynda da básekege qabiletti bolýyn kózdep otyr. Onyń ústine bolashaǵy joq eldi mekenderdiń sany kúnnen-kúnge artyp keledi. Bul túıtkildiń aldyn alýda da osyndaı qadamdardyń róli joǵary.
«О́ńir agrarly bolǵanymen, basqa da salalardy umyt qaldyrýǵa bolmaıdy. Ásirese sportqa qumar aýyl balalarynyń bos ýaqytynda ne isteıtini mańyzdy. Kúsh-qýatyn osyndaı sport keshenderinde jumsap, erteń elimizdiń týyn kókke kóterse ıgi. Osy rette oblys ákimdiginiń bastamasyna kóńil qýanady», deıdi aýyl turǵyny Áskerbek Aıtmuhambet.
Oblys ákimi baspasóz qyzmetiniń málimetinshe, bıyl oblysta 17 jańa sport nysanynyń qurylysyna 4 mlrd teńgeden astam qarjy bólingen. Sonyń ishinde Almalydaǵy sport kesheni – bıyl paıdalanýǵa berilip otyrǵan altynshy nysan. Jańa sport keshenindegi voleıbol, basketbol, kúres, boks zaldary, shahmat, toǵyzqumalaq úıirmelerine arnalǵan bólmeler barlyq qajetti qural-jabdyqtarmen qamtylǵan. Sol sııaqty kıim iletin, jýynatyn oryndar qarastyrylǵan. Aýlasynda shaǵyn fýtbol, basketbol, voleıbol alańdary bar. Nysan 50 orynǵa laıyqtalǵan. Bul jańalyqqa aýyl turǵyndary da dán rıza.
«Bizdiń aýyl áýelden sportqa jaqyn. Kezinde bizdiń óńirden Ábilseıit Aıhanov, Amanjol Buǵybaev sııaqty ataqty palýandar shyqqan. Memlekettiń osyndaı qoldaýynan keıin sondaı dańqty sportshylardyń jolyn jalǵaıtyn jastarymyz aýylymyzdan kóptep shyǵatynyna senemin», deıdi aýyl turǵyny Zaǵılıa Balabekova.
Aýyldaǵy sporttyq seksııaǵa qatysýshy jas sportshylardyń biri Darhan Nurahmet te pikir bólisti: «Buǵan deıin jattyqtyrýshymyz aýylymyzdan 3 shaqyrym qashyqtyqtaǵy aýdan ortalyǵyna bizdi óz kóligimen jattyǵýǵa aparyp júrgen. Qystaǵy sýyqta baryp-kelý qıyn bolatyn. Endi alysqa barmaı-aq óz aýylymyzda jattyǵatynymyzǵa qatty qýanyp otyrmyz. Aýylymyzda salynǵan sport kesheninde budan bylaı turaqty daıyndala alamyz», deıdi jas balýan.
Aıta ketelik, Sarqan aýdanyna qarasty Almaly aýylyndaǵy jalpy aýmaǵy 1 343 sharshy metr bolatyn bul sport kesheniniń qurylysy ótken jyly bastalǵan edi. Qyrkúıek aıynyń sońynda Sarqan aýdanynyń Baqaly aýylynda da aýmaǵy 3 200 sharshy metrlik jańa stadıon paıdalanýǵa berildi.
Jetisý oblysy