Batys Qazaqstan oblysynda «Aqjaıyqtyń aqshaǵalasy» atanǵan aqyn, «Otan» jáne «Qurmet» ordenderiniń ıegeri, Memlekettik syılyqtyń laýreaty Aqushtap Baqtygereevanyń 80 jasqa tolýyna oraı aıtýly is-shara ótti.
Qazaqtyń aıaýly aqyn qyzynyń mereıtoıyn týǵan jerinde atap ótýge jyl boıyna kóptegen is-shara josparlanǵan edi. Kezdesýler, poezııa saǵattary, aqyn oqýlary, túrli baıqaý oblystyń birneshe aýdanynda ótip, aqyn shyǵarmashylyǵy keńinen nasıhattaldy. Bul is-sharalardyń bárinde Aqushtap poezııasymen birge jalpy ádebıet álemi, qazaq mádenıeti, ulttyń ulaǵaty da shyrqaý bıikke shyǵyp, halyq súıispenshiligine bólendi.
Mysaly, aqyn mereıtoıyna oraı uıymdastyrylǵan qyz-kelinshekter arasyndaǵy oblystyq jyr músháırasyna qazylyq etken qalamger, Qazaqstan Jazýshylar odaǵynyń múshesi Baýyrjan Ǵubaıdýllın osyndaı is-sharalar jastardy ádebıet álemine tartyp, kitap oqý mádenıetin qalyptastyrýǵa sep bolatynyn atap ótti.
Osy mereıtoı aıasynda Oral qalasynda «Aqulpa» respýblıkalyq kompozıtorlar baıqaýy da tabysty ótti. Aqynnyń lırıkalyq jyrlary buryn da ásem áýenge bólenip, el aýzynda júrse, jańa baıqaýdyń arqasynda taǵy da bir top jańa týyndy sahnaǵa jol tartty. Bul baıqaýǵa Astana qalasy, Aqmola, Aqtóbe, Túrkistan, Mańǵystaý, Batys Qazaqstan oblystarynan úmitkerler ótinish bergen eken. Nátıjesinde, bas júlde aqynnyń «Mahabbatym jaıly jazbas edim» óleńine án shyǵarǵan batysqazaqstandyq jas kompozıtor Eljas Maǵzomǵa buıyrdy. Syılyq sazgerge avtordyń óz qolymen tabystaldy. Aıta keteıik, jańa án shynymen de júrek qylyn shertetin áserli dúnıe bolyp shyqqan. Baıqaýdyń ózge júldeleri de osal emes. Aqynnyń mereıtoıynan kúlli qazaq mádenıeti paıda kórdi, bıikteı tústi dep otyrǵanymyzdyń dáleli osy.
Aqushtap Baqtygereeva mereıtoıynyń shyrqaý shegi onyń týǵan jeri – Terekti aýdanynda boldy. Aqynnyń kindik qany tamǵan Aqjaıyq aýylynda Ádebıetshiler úıi ashyldy. Alty bólmeli sáýletti saraıda óńirdiń óner adamdaryna barlyq jaǵdaı jasalǵan. Aqynnyń jeke buıymdarynan jınaqtalǵan bólme – jeke kabınet mýzeı syndy áser berse, ózge bólmelerde jastar bas qosyp, túrli úıirme jumysyn júrgizýine múmkindik jasalǵan. Batys Qazaqstan oblysynda buǵan deıin de tabysty qyzmet etip kele jatqan Juban úıi, Qadyr saraıy sekildi óner ordasyna aınalar dep úmit ettik.
– Bul Terekti aýdany – tarıhy joǵalǵan, tolyq túgendelmeı júrgen óńir. О́ıtkeni otarshyldyqtyń ospadar saıasaty bul jerde kúshti júrdi. Tipti keshegi tyń ıgerý naýqany kezinde Terekti topyraǵy túrenniń astynda qaldy. Ylǵı túrmeden shyqqan, tek qana traktor aıdaı biletinder keldi. Terekti aýdanynyń negizin solar qurap, sodan bizde til joǵaldy. Til joǵalsa, kóp nárse joǵalady. Endi osy Ádebıetshiler úıiniń áserinen týǵan jerdiń tól tarıhy jınaqtalsa, tilimiz tórge shyqsa, meniń armanym joq. Osyǵan qatty qýanyp otyrmyn, – dedi Aqushtap aqyn.
Aqjaıyqtaǵy ádebıetshiler úıiniń alǵashqy is-sharasy aqynnyń ózi qatysqan qalamgerler konferensııasy boldy. Jıyndy Jazýshylar odaǵy Batys Qazaqstan oblysy fılıalynyń tóraǵasy, oblystyq «Oral óńiri» gazetiniń bas redaktory, Ulttyq quryltaı múshesi Baýyrjan Ǵubaıdýllın júrgizip, birneshe taqyryp talqylandy. «Aqjaiyq» telearnasynyń dırektory Klara Qambetova Aqushtap Baqtygereıqyzyn arnanyń alpys jyldyq mereıtoıyna arnalǵan merekelik medalmen marapattady. Kezdesýde aqynnyń 80 jasyna arnaıy túsirilgen fılmnen úzindi kórsetildi.
Aqyn mereıtoıyna arnalǵan is-sharalardyń qorytyndy núktesi aýdan ortalyǵy Terekti aýylynda «Aqjaıyqqa jyr arnaǵym keledi» atty ádebı-sazdy keshpen qoıyldy. Sahnada aqyn sózine jazylǵan ánder shyrqalyp, jas aqyndar toı ıesine arnaý óleńderin oqydy. О́z kezeginde Aqushtap Baqtygereıqyzy da jańa jyrlaryn ortaǵa saldy.
Kesh sońynda aqyn sózine jazylǵan «Oraldyń erke samaly» áni shyrqaldy. Terekti aýdanynyń ákimi Álııa Muhanbetjanova mereıtoı ıesiniń ıyǵyna aýdan jurty atynan kamzol men aq oramal japty.
Batys Qazaqstan oblysy