Jol apaty 16 qazan kúni saǵat 07:30-da Beıneý-Tájen tas jolynda bolǵan, dep habarlaıdy Egemen.kz.
Oblystyq polısııa departamentiniń málimetinshe, Jac kóligi jol jıeginde turǵan MAN júk kóligine soǵylǵan. Júk kóligi shekaradan ótý úshin kezekte turǵany belgili boldy.
«Kólikte barlyǵy 10 adam bolǵan. Olardyń tórteýi Beıneý ortalyq aýdandyq aýrýhanasyna jatqyzyldy. Zardap shekkenderdiń jaǵdaıy ortasha aýyr. Naýqastar qajetti emdi tolyq kólemde alyp jatyr. Oqıǵa saldarynan 6 adam qaza tapty», dep habarlady oblystyq polısııa departamentiniń baspasóz qyzmeti.
Sonymen qatar jol-kólik oqıǵasyna qatysqan kólikterdiń О́zbekstan Respýblıkasynda tirkelgeni anyqtalǵan. Sondaı-aq zardap shekkender men qaza tapqandar Reseı Federasııasynan ketken О́zbekstan azamattary ekeni belgili boldy.
Atalǵan jol-kólik oqıǵasy boıynsha sotqa deıingi tergeý amaldary bastalǵan.