Qaraǵandy oblysyndaǵy Saran qalasynda barlyq turǵyn úıler men áleýmettik nysandar jylýmen qamtylǵan. Bul týraly Energetıka mınıstri Almasadam Sátqalıev aıtty, dep habarlaıdy Egemen.kz.
Almasadam Sátqalıev jergilikti qazandyqtardyń, ortalyq jylý kózderiniń, jylý jelileri men áleýmettik nysandardyń jaı-kúıin jer-jerde tekserip, jergilikti jedel shtabtyń otyrysyn ótkizgen.
Sonymen qatar jylý kózderiniń qajetti otynmen qamtamasyz etilgeni habarlandy.
«Biz barlyq jylý kózderin aralap shyqtyq, jylýmen qamtý syzbasyn qalpyna keltirý jumystarynyń barysyn egjeı-tegjeıli saraptadyq, kelesideı sheshim qabyldandy: ortalyq jylý kózi iske qosylǵanǵa deıin qalany jylýmen qamtý jergilikti elektr jelisi arqyly júzege asyrylady. Barlyq áleýmettik nysan jylýmen qamtamasyz etilgen, olar óndiristik baǵdarlamalarǵa sáıkes jumys istep tur», dedi Almasadam Sátqalıev.
О́z kezeginde Qaraǵandy oblysynyń ákimi Ermaǵanbet Bólekpaev rezervte turǵan jergilikti qazandyqtardyń barlyǵy daıyndalyp, iske qosylǵanyn atap ótti.
Aıta keteıik, qazir oqıǵa ornynda arnaıy komıssııa jumys istep jatyr, onyń quramyna energetıkalyq qadaǵalaý ókilderi, oblys jáne basqa da departamentter men Tótenshe jaǵdaılar departamentiniń basshylary kiredi. Sonymen qatar ortalyq jylý kózine qural-jabdyq beretin zaýyttardan arnaıy mamandar shaqyrylǵan.
Eske salaıyq, 13 qazanda Saran qalasynda jurt jylýsyz otyrǵany týraly aqparat tarady. Jergilikti turǵyndar úılerinde salqyn ekenin aıtyp shaǵymdandy. Ákim Erkin Baýlyqov qalada jylý joq ekenin rastap, jylý júıesi jańartylǵanyn, ortalyq júıeler arqyly jylý berilip jatqanyn alǵa tartqan.