ASTANA. 16 maýsym. Astana qalalyq ishki ister departamenti esirtki bıznesine qarsy kúres basqarmasynyń qyzmetkerleri elorda aýmaǵynda zańsyz esirtki tasymaldaǵan 28 jastaǵy Aqmola oblysynyń turǵynyn qolǵa túsirdi. Bul týraly qalalyq ishki ister departamentiniń baspasóz qyzmeti habarlady.
Polısııa qyzmetkerleri aqmolalyq jigitti jedel izdestirý is-sharalary kezinde qolǵa túsirip, odan salmaǵy 300 gramm geroın tárkilegen. Keıin ustalǵan jigittiń turyp jatqan mekenjaıy tekseriledi. Tintý kezinde sharýashylyq qurylysynan taǵy da esirtki zattary tabylyp, tárkilendi. Saraptama qorytyndysy bul zattardyń geroın ekenin anyqtady. Tárkilengen esirtki zatynyń jalpy salmaǵy – 11 kılo. Onyń qara bazardaǵy quny jarty mıllıon AQSh dollarynan asady. Mundaı kólemdegi geroındi 55 myń ret mólsherde (doza) qoldanýǵa bolady.
Atalǵan derek Qylmystyq kodekstiń 289-babymen sotqa deıingi tergeýdiń biryńǵaı tizimine tirkeldi. Kúdikti Astana qalalyq ishki ister departamentiniń ýaqytsha ustaý ızolıatoryna qamalyp, sotqa deıingi tergeý júrgizilýde.
Qazirgi tańda atalǵan departamenttiń qyzmetkerleri esirtkiniń jetkizý men ótkizý arnalaryn anyqtaý maqsatynda keshendi jedel izdestirý is-sharalaryn júrgizýde. Sonymen qatar, arnaıy operasııa barysynda ustalǵan kúdiktiniń Astana aýmaǵynda tirkelgen esirtki qylmystaryna qatystylyǵy tekseriledi.
Elaman Qońyr.
Derek: Astana qalalyq ishki ister departamentiniń baspasóz qyzmeti.
Sýret: lada.kz.