Batyr erligi umytylmaıdy

Bıyl 100 jyldyq mereıtoıy respýblıkalyq deńgeıde toılanyp jatqan qazaqtyń erjúrek batyr uly, Berlındegi Reıh­stagqa alǵash bolyp jeńis týyn tikken, Halyq qahar­many Rahymjan Qosh­qarbaevtyń esimin ulyqtaý maqsatynda, uly tulǵanyń týǵan kúnimen oraılas­tyra uıymdastyrylǵan kon­fe­rensııanyń shymyl­dyǵyn Ulttyq qorǵanys ýnı­ver­sıtetiniń bastyǵy, PhD, dosent, general-maıor Asqar Dosbosynuly Mustabekov ashty.

– Qarýly kúshteriniń Bas qolbasshysy, Memleket bas­shysy Qasym-Jomart Toqaevtyń «Egemen Qazaqstan» gazetine suhbat bergenin bárińiz bilesizder. Sol suhbatta Mem­leket basshysy «El tarıhynda erekshe orny bar tulǵalarǵa qurmet kórsetý dástúri elimiz­diń jalpy ulttyń biregeıligin nyǵaıta túsýge zor septi­gin tıgizedi» dedi. Ulttyń biregeı­ligin saqtaý úshin batyrlar rýhyna qurmet kórsetip, olardyń kózsiz erligin keıingi urpaqqa nasıhattaý isin úzdiksiz júrgize berýge tıispiz. Búgingi is-shara sonyń naqty mysaly bola alady, – dedi Ulttyq qorǵanys ýnıversıtetiniń basshysy.

Sondaı-aq Asqar Dosbo­syn­uly konferensııa qo­­naq­taryn áıgili ǵalym Qanysh Sát­baevtyń týǵany­na – 125, dańq­ty batyrlar Saǵadat Nur­­maǵam­betov pen Rahym­jan Qoshqar­baevtyń týǵanyna 100 jyl tolýymen quttyqtap, is-shara barysynda elimizdiń ás­kerı tarıhyna qatysty keń kólemdegi teorııalyq jáne tájirı­belik máselelerdiń talqy­lanatynyna senim bildirdi.

Qarýly Kúshter Bas shtaby akademııasy jedel óner jáne áskerı tarıh kafedrasynyń aǵa oqytý­shysy, PhD, zapastaǵy pol­kov­nık Dáýren Maı­hıev Ekinshi dúnıejúzilik soǵystyń sońǵy núktesin qoıý­da Berlındegi shaıqas­­tyń mańyzyn arnaıy da­ıyndalǵan kórneki qural­dar­men derekterge súıenip baıandap shyqty.

Baıandamada ǵalym «Rahym­­jan Qoshqarbaevtyń Reıhs­tagqa tý tigý erligin urpaq sanasyna sińiremiz desek, fashızmdi túpkilikti talqandaýda keńes áskeri­niń qandaı táýekelder­ge bar­ǵanyn, Berlındi alý shaıqa­synyń adamzat tarıhyndaǵy mán-maǵyna­syn tereńirek bilip alýǵa tıispiz» degen oıyn ortaǵa saldy.

Munan keıingi baıandamalarda Rahymjan Qoshqar­baev­­tyń Reıhstagqa tý tigý úshin 360 qadam jerdi jeti saǵat boıy qalaı jyl­jyǵany, Qosh­qarbaev qyzmet etken polktiń jaýyn­ger­lik erlikteri, Halyq qahar­many týraly jazylǵan ádebı týyndylar men zertteý eńbekterdiń áskerı maman­darǵa áseri týraly kóptegen máse­leler aıtyldy.

Sondaı-aq konferensııa barysynda ǵalymdar «Qazaq­stannyń egemen memleket retindegi áskerı zańnamasyn jetildirý» taqyrybynda da óz oılaryn ortaǵa saldy.

Is-sharaǵa onlaın qatysqan Áýe qorǵanysy kúshteriniń Áskerı ınstıtýty, Ulttyq ulan akademııasy, Sabyr Rahymov atyndaǵy áskerı kolledj mamandary men Ujym­dyq qaýipsizdik shar­ty uıy­mynyń ókilderi fa­shızmdi talqandaýdaǵy batyr­­lar­dyń erlik isterine ǵy­ly­mı turǵyda baǵa berý máse­­lesin kún tártibinen túsir­meýdi usyndy.

Konferensııa sońyn­da Ulttyq qorǵanys ýnı­versı­teti­niń bastyǵy, general-maıor, PhD Asqar Musta­bekov áskerı mamandar men ǵalymdarǵa alǵys bildirdi.