Ulttyq kitaphanada fılologııa ǵylymdarynyń doktory, professor, R.B.Súleımenov atyndaǵy Shyǵystaný ınstıtýtynyń bas dırektory Dúken Másimhanulynyń «Altaı bı» (tarıhı dastan) atty kitabynyń tusaýkeser rásimi ótti.
Bı, sheshen, Jetisýdy jońǵarlardan azat etýge atsalysqan qazaq tarıhyndaǵy kórnekti tulǵalardyń biri Altaı Naımanbaıulyn dáripteýge arnalǵan is-sharaǵa otandyq ǵalymdar, tarıhshylar, ádebıettanýshylar men batyrdyń urpaqtary qatysty.
Jıyndy Qazaqstannyń eńbek sińirgen qaıratkeri Qoshan Mustafa tizgindedi. Alqaly jıynda Qazaq agrarlyq zertteý ýnıversıtetiniń professory Dámir Álimqulov Altaı bı týraly tyń derekter keltirdi.
«Altaı bıdiń erligin, bolmysyn, qaharmandyq jolyn, ulaǵatty sózderin oıdaǵydaı jetkizgen avtor Dúken Másimhanulyna alǵysymyz sheksiz. Ol Altaı bıdi qaıta tiriltti. Tarıhı dastan jazý ekiniń biriniń qolynan kelmeıdi», dedi fılologııa ǵylymdarynyń doktory, L.N.Gýmılev atyndaǵy EUÝ professory Serik Negımov.
Memlekettik syılyqtyń laýreaty Baıynqol Qalıuly dastannyń ár bóliminiń ereksheligine toqtaldy. «Avtor «Alǵashqy joryq» dep ataǵan birinshi taraýynda Altaı bı – atamyzdyń erligin, batyrlyǵyn sıpattaǵan. «Týra bıde týǵan joq» degen kelesi taraýda bıligi týraly sóz etedi. Úshinshi taraýdy «Tuńǵysh tórelik» dep atap, babamyzdyń alǵash jasaǵan tóreligi týraly aıtsa, tórtinshi taraýda danalyǵy jyrlanady. Mine, osylaısha, Altaı bıdiń basyndaǵy birneshe ereksheligin qozǵaǵan. Jyrda ertedegi qıssalardyń dástúrin saqtaǵan», dedi B.Qalıuly.
Altaı bı – Jetisý ólkesin Jońǵar shapqynshylyǵynan qorǵaýda batyrlyǵymen ári ádildigimen esimi elge tanymal bolǵan bı. Abylaıdyń aq týynyń astyna birigip, elin jońǵar shapqynshylyǵynan azat etýge tikeleı aralasqan tulǵa. Bul týraly Ál-Farabı atyndaǵy QazUÝ janyndaǵy Qazirgi zamanǵy qytaıdy zertteý ortalyǵynyń dırektory, tarıh ǵylymdarynyń doktory, professor Nábıjan Muhamethanuly aıtty. UǴA akademıgi, Ál-Farabı atyndaǵy Qazaq ulttyq ýnıversıteti Qazaqstan tarıhy kafedrasynyń meńgerýshisi, tarıh ǵylymdarynyń doktory, professor Bereket Káribaev «Altaı bı» dastanyndaǵy kórkemdik shyndyqty tilge tıek etse, Sh.Ýálıhanov atyndaǵy tarıh jáne etnologııa ınstıtýtynyń bas dırektory, UǴA akademıgi, tarıh ǵylymdarynyń doktory, professor Zııabek Ermuhanuly «Qazaqtyń bıler soty jáne onyń «Altaı bı» dastanyndaǵy kórinisi» taqyrybynda baıandama jasap, dastan týraly oıyn ortaǵa saldy.
Almaty oblysy