Bıyl 14 391 etnıkalyq qazaq tarıhı otanyna oralyp, qandas mártebesin alǵan. Jalpy 1991 jyldan beri respýblıkaǵa 1 mln 142,7 myń etnıkalyq qazaq oralǵan, dep habarlaıdy Egemen.kz.
Eńbek jyne halyqty áleýmettik qorǵaý mınıstrliginiń málimetinshe, jyl basynan Qazaqstanǵa qandastardyń 45,8%-y Qytaıdan, 39% – О́zbekstannan, 5,9% – Mońǵolııadan, 5,2% – Túrikmenstannan, 2,9% – Reseıden jáne 1,2% basqa elderden kelgen.
2024 jylǵy 1 qazandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 57,6%-dy, eńbekke qabiletti jastan kishi 33,1%-dy jáne zeınetkerler 9,3%-dy quraǵan. Al eńbekke qabiletti jastaǵy qandastardyń ishinen bilim deńgeıi boıynsha 17,9%-y joǵary bilimdi, 24,4%-y orta kásibı bilimdi, 54,4%-y jalpy orta bilimdi, jáne 3,3%-ynda bilimi joq.
«Qonys aýdarǵan etnıkalyq qazaqtar respýblıkanyń túrli óńirlerine qonystandy. Sonymen birge qandastardy qonystandyrý úshin kelesideı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Shyǵys jáne Soltústik Qazaqstan oblystary. Qonystandyrý óńirlerinde 2024 jylǵa arnalǵan qandastardy qabyldaý kvotasy 3 033 adamdy quraıdy. 2024 jylǵy 1 qazandaǵy jaǵdaı boıynsha qonystandyrý óńirlerine 2 477 qandas qonys aýdardy», delingen mınıstrlik habarlamasynda.
Aıta keteıik, joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady: bir mezgilde otaǵasyna jáne otbasynyń árbir múshesine 70 AEK (258,4 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (55,3-den 110,7 myń teńgege deıin) mólsherinde.
Sonymen qatar jyl basynan beri 2140 qandasqa túrli qoldaý sharalary kórsetilgen. Atap aıtqanda, 575 adam turaqty jumysqa ornalastyrylǵan.