Mádenıet jáne aqparat mınıstrliginiń bastamasymen kúzgi kanıkýl kezinde mektep oqýshylaryna birqatar tegin is-sharalar uıymdastyrylmaq, dep jazady Egemen.kz.
Máselen Astana qalasynyń oqýshylary Ulttyq mýzeıde mektep demalysy kezinde tarıhı-mádenı murany nasıhattaý maqsatynda taqyryptyq tegin ekskýrsııalardy tamashalaı alady. Ekskýrsııa barysynda oqýshylar brıtandyq músinshi Iýnýs Safardıardyń týyndylary men otandyq sýretshi Tileýjan Batanovtyń jeke kórmelerimen tanysady.Ábilhan Qasteev atyndaǵy QR Memlekettik óner mýzeıinde «Altyn kúz» taqyrybynda plener, tumar jasaý boıynsha sheberlik sabaqtary josparlanǵan. QR Memlekettik Ortalyq mýzeıi balalar úshin «Qazaq handyǵynyń bıleýshileri» jobasy aıasynda sıkldik sabaqtar, «Abylaı han» jáne «Qazaq halyq folklory: qazaq ertegileri áleminde» jobasy aıasynda teatrlandyrylǵan «Aldar Kóse – meniń súıikti keıipkerim» mýzeılik sabaqtaryn uıymdastyrady.Jambyl atyndaǵy Qazaq memlekettik akademııalyq fılarmonııada «Oqýshylarǵa arnalǵan abonoment» jobasy boıynsha ár konsertke kirý úshin múmkindigi shekteýli balalarǵa arnaıy 10 oryn tegin qarastyrylǵan.Abaıdyń «Jıdebaı-Bórili» memlekettik mýzeı-qoryǵy «Kúzgi demalys mýzeı aıasynda» atty aptalyq ótkizip, oqýshylar arasynda vıktorınalar, «Tańbaly» mýzeı-qoryǵy oqýshylar úshin qyzyqty kvest-oıynyn ótkizýdi josparlap otyr.
«Áziret Sultan» memlekettik tarıhı-mádenı mýzeı-qoryǵynda osy jyldyń qyrkúıek aıynan bastap arnaıy mektep oqýshylary úshin «Iаsaýıtaný» klýby men «Jas arheolog», «Jas restavrator», «Jas ekskýrsovod» úıirmeleri turaqty túrde tegin jumys jasap jatyr.Mýzeı pedagogıkasy jobasy boıynsha «Botaı» mýzeı-qoryǵynda balalar úshin tegin kórmeler men ekskýrsııalar uıymdastyrylyp, ashyq esik kúnderi ótkiziledi. Sondaı-aq, ekskýrsııa barysynda «Botaı mádenıetiniń arheologııalyq zertteýleri» ınstallıasııasy usynylady.«Ejelgi Taraz eskertkishteri» memlekettik tarıhı-mádenı mýzeı-qoryǵyna qarasty «Qarahan», «Dáýitbek», «Aısha bıbi», «Babadja hatýn» keseneleri, «Aqyrtas» sáýlet-arheologııalyq kesheni men «Kóne Taraz» ashyq aspan astyndaǵy arheologııalyq saıabaǵyna balalar jyl boıyna aqysyz kire alady.2017 jyldan bastap ár aıdyń sońǵy jeksenbisinde jáne kanıkýl kúnderi mektep oqýshylary «Esik» memlekettik tarıhı-mádenı mýzeı-qoryǵyna tegin kire alady. Sonymen qatar, Esik jáne Almaty qalalaryndaǵy múgedek jáne kórý qabileti nashar balalarǵa mýzeı-qoryqqa aqysyz kirý qarastyrylǵan.«Saraıshyq» memlekettik tarıhı-mádenı mýzeı qoryǵy mektep oqýshylaryna arnaıy ekskýrsııa uıymdastyryp, «Kúz qyzyqtary» sheberlik saǵatyn ótkizedi.«Otyrar» memlekettik arheologııalyq mýzeı-qoryǵy Arystanbab kesenesi, Otyrar-tóbe jáne Sapar ortalyǵy ǵımarattaryna ekskýrsııalardy tegin uıymdastyrady.«Ulytaý ulttyq tarıhı-mádenı jáne tabıǵı mýzeı-qoryǵy» mektep oqýshylaryna arnap «Joshy ulysy: tarıhy jáne murasy» taqyrybynda tegin kórme uıymdastyrady. Kórmede Ulytaý óńirinde ornalasqan Altyn Orda dáýirine jatatyn tarıh jáne mádenıet eskertkishteri tanystyrylady.