Oklend ýnıversıtetiniń professory, nevrologııa, kognıtıvti psıhologııa jáne bilim salasynyń tanymal sarapshysy, «Qalaı oqýdy úırenemiz?» ashyq onlaın kýrsynyń avtory Barbara Oaklı qazir qoǵamda ashyq qoldanylyp jatqan jasandy ıntellektiniń róli men onyń bilim júıesindegi qoldanylýy týraly «Zoom» qosymshasy arqyly semınar ótkizdi. Ol osy salada uzaq jyl jumys istep kele jatqanyn aıtyp, qazir zamanǵa saı jaryqqa shyqqan qosymshalarda tildik modeldiń óte kreatıvti ekenin jetkizdi.
Sonymen birge professor ár kompanııanyń jasandy zerde salasyndaǵy sátti jasaǵan qosymshalaryn tanystyrdy. Mysaly, «Google» kompanııasynyń «Gemeni», «Amazon» kompanııasynyń «Cloude», «Microsoft» kompanııasynyń «Open AI», «ChatGPT» ónimderiniń bir-birinen ereksheligi men ony tıimdi paıdalanýdyń qajettiligin tilge tıek etti.
«Adam qashanda birdeńe bilsem degen nıetpen ómir súredi. Al ol eshteńe úırenbese, damı almaıdy. Qazir bul jaǵdaı tipten ózgerdi. Kúndelikti tirshilikte myńdaǵan neıronnyń óz róli bar ekenin aıtamyn. Bir nárseni úırenýge kóp ýaqyt ketýi múmkin. Biraq biz odan lázzat alamyz. Bul Qazaqstan qoǵamyna da tıisti kómegin tıgizedi dep oılaımyn», dedi bilikti sarapshy.
Qalaı desek te, jasandy ıntellekt qosymshalary ómirimizdi kóp jeńildetedi. Biraq kúndelikti ómirde oǵan táýeldi bolýdyń da tıimsiz ekenin bilý mańyz. Barbara Oaklıdiń aıtýynsha, ásirese stýdentter jasandy zerdeni kóp paıdalanady, bul olardyń bilim alý barysyndaǵy qıyndyqty sál de bolsa jeńildetkenimen, bir jaǵynan, olarǵa keri áserin tıgizýi múmkin. Sondyqtan professor qandaı iste bolsyn myń oılanyp, júz tolǵanýdyń paıdasy zor ekenin túsindirdi.