ASTANA. 16 maýsym. «Arabııa túbegindegi ál-Kaıda» lańkestik uıymynyń kóshbasshysy Naser ál-Vahıshı óltirildi. Bul týraly Iemen qaýipsizdik qyzmeti taratqan aqparatqa silteme jasaǵan CNN telearnasy habarlady.
«Arabııa túbegindegi ál-Kaıda» uıymy Iemende ornalasqan. Telearna taratqan málimetterge súıensek, lańkestik uıym basshysy AQSh-tyń ushqyshsyz basqarylatyn qarýymen 12 maýsym kúni óltirilgen.
Amerıka barlaýshylarynyń derekterine qaraǵanda, qazirgi tańda AQSh bıligi ál-Vahıshıdiń ólimine qatysty aqparattyń ras-ótirigin tekserýde. Al Iemende prezıdent Abd Rabbý Mansýr Hadı áskeri men «Ansar Alla» shııttik qozǵalysynan shyqqan kóterilis jasaqtarynyń arasyndaǵy qarýly qaqtyǵys áli de jalǵasýda. Búlikshil jaýyngerlerdiń biraz bóligi burynǵy prezıdent Alı Abdalla Salehtiń jaqtastary. «Arabııa túbegindegi ál-Kaıda» qoldaýshylary áskerı qaqtyǵystarǵa belsendi qatysyp, eldiń ońtústiginde soǵys júrgizip keledi.
Aıbek Moldabaev.
Derek: CNN.
Sýret: RIA «Novostı».