Parlament Senatynda Palata Spıkeri Máýlen Áshimbaevtyń qatysýymen Respýblıka kúnine arnalǵan saltanatty jınalys ótti, dep habarlaıdy Egemen.kz vedomstvonyń baspasóz qyzmetine silteme jasap.
Máýlen Áshimbaev áriptesterin ulttyq merekemen quttyqtap, egemendik týraly deklarasııa táýelsizdikke jol ashqanyn jáne Qazaqstandy halyqaralyq quqyqtyń derbes sýbektisi retinde bekitkenin atap ótti.
Sondaı-aq ol bul kúnge ulttyq mártebe berý tarıhı ádilettiliktiń jarqyn kórinisi ekenin tilge tıek etti.
«Prezıdentimiz Qasym-Jomart Kemeluly Toqaev Ulttyq quryltaıdyń birinshi otyrysynda Respýblıka kúnine ulttyq mereke mártebesin qaıtarýdy usyndy. Mundaı qadam bolashaq urpaq úshin tarıhı mańyzǵa ıe. Bul ǵasyrlarǵa jalǵasqan memlekettiligimizdiń qaıta jańǵyrýynyń nyshany. Osy egemendik jolynda halqymyz talaı «tar jol, taıǵaq keshýden» ótkeni belgili», dedi Máýlen Áshimbaev.
Sonymen qatar is-shara barysynda Senat Tóraǵasy Memleket basshysynyń bastamasymen qolǵa alynǵan áleýmettik-ekonomıkalyq jáne saıası reformalardyń iske asyrylýyn zańnamalyq turǵydan qamtamasyz etý aıasynda Palata depýtattarynyń aldynda turǵan mindetterge toqtaldy. Senatorlardyń aldaǵy jumysy osy mindetterge sáıkes júrgiziledi.
«Qazirgi tańda Prezıdentimizdiń bastamasymen elimizde aýqymdy ári keshendi reformalar iske asyrylyp jatyr. Sońǵy jyldarda Ádiletti Qazaqstan qurý, azamattardyń ál-aýqatyn arttyrý, ekonomıkalyq ósim jáne óńirlerdi damytý baǵyttarynda mańyzdy qadamdar jasadyq. Memleket basshysynyń saıası baǵdaryn zańnamalyq turǵydan qamtamasyz etý – Senat qyzmetiniń negizgi basymdyǵy. Aldaǵy ýaqytta da birlesip, memlekettik múdde jolynda nátıjeli eńbek etemiz dep senemin», dep Máýlen Áshimbaev is-sharaǵa qatysqandardy Respýblıka kúnimen quttyqtady.
Saltanatty jıynda Palata Spıkeri senatorlar men Apparat qyzmetkerlerine memlekettik nagradalardy tapsyrdy. Memleket basshysynyń Jarlyǵymen senator Darhan Qydyráli III dárejeli «Barys» ordenimen, depýtattar Sergeı Karplıýk pen Serik Shaıdarov «Parasat» ordenimen nagradtaldy. Sondaı-aq senator Aıgúl Qapbarova jáne Senat Apparaty Basshysynyń orynbasary Oljas Danabekov «Qurmet» ordenimen marapattaldy. Palata depýtattary Bıbigúl Aqqojına men Qaırat Tastekeevke jáne birneshe Apparat qyzmetkerine «Eren eńbegi úshin» medali tabys etildi. Budan basqa birqatar depýtatqa halyqaralyq parlamentaralyq uıymdardyń nagradalary tapsyryldy.