Ulttyq mereke – Respýblıka kúni qarsańynda Ǵylym jáne joǵary bilim mınıstrliginiń bastamasymen saltanatty is-shara ótti. Is-sharaǵa Ǵylym jáne joǵary bilim mınıstri Saıasat Nurbek, «Qazaqstannyń Eńbek Eri» ataǵynyń ıegeri, Prezıdent janyndaǵy QR Ulttyq ǵylym akademııasynyń vıse-prezıdenti Asqar Jumadildaev, Memlekettik Eltańbanyń avtory Jandarbek Málibekov, joǵary oqý oryndarynyń qyzmetkerleri, ǵalymdar men zertteýshiler qatysty, dep habarlaıdy Egemen.kz.
Saıasat Nurbek qatysýshylardy merekemen quttyqtaı otyryp, óziniń quttyqtaý sózinde: «Bul mereke – Táýelsiz elimizdiń memlekettilik pen egemendikke bastaǵan tarıhı qadamynyń aıqyn sımvoly. Respýblıka kúnin ulttyq mereke retinde belgileý – memleketimizdiń myzǵymas negizderin nyǵaıtýǵa baǵyttalǵan mańyzdy qadam. Bul mereke bizdiń ulttyq biregeıligimizdi jańǵyrtyp, bolashaqqa senimmen qaraýǵa yntalandyrady», dep atap ótti.Mınıstr bıyl ǵylym salasyndaǵy jetistikter erekshe nazarǵa alynyp, kóptegen ǵalym otandyq ǵylymdy damytýdaǵy erekshe jetistikteri, men belsendi qoǵamdyq qyzmeti úshin Memleket basshysynyń Jarlyǵymen memlekettik nagradalarǵa ıe bolǵanyn, bul olardyń mártebesiniń jáne qoǵamdaǵy róliniń artqanyn kórsetetinine toqtaldy.Saltanatty is-shara aıasynda Asqar Jumadildaev Respýblıka kúniniń tarıhı mańyzyna toqtalyp, 25 qazan kúni qabyldanǵan Egemendik deklarasııasynyń elimiz úshin erekshe mańyzyn atap ótti. Onyń aıtýynsha, bul qujat elimizdiń óz bolashaǵyn derbes aıqyndaýyna, saıası, ekonomıkalyq, mádenı damýdyń jańa kezeńine ótýine negiz qalady, sondaı-aq ulttyq memlekettiligimizdi qalyptastyrýǵa jol ashyp, qazirgi Qazaqstannyń táýelsizdikke qol jetkizýine negiz boldy.
Mınıstr Memleket basshysynyń atynan eldiń damýyna eleýli úles qosqan birqatar ǵylym jáne joǵary bilim salasynyń ókilderine «Parasat», «Qurmet» ordenderin, «Qazaqstannyń eńbek sińirgen qaıratkeri» qurmetti ataǵyn, «Eren eńbegi úshin» medali men Prezıdenttiń «Alǵys hatyn» tabystady. Sondaı-aq ǵylym, joǵary bilim jáne til saıasaty salasyndaǵy eńbegimen erekshelengen joǵary oqý oryndarynyń qyzmetkerleri, ǵalymdar men zertteýshiler «Ǵylymdy damytýǵa sińirgen eńbegi úshin», «Ana tilin damytýǵa qosqan úlesi úshin», «Ahmet Baıtursynuly» tósbelgisimen, qurmet gramotalary jáne alǵys hattarmen marapattaldy.