Qazan aıynda Serbııanyń Kragýevas qalasynda «Joakimfest» XIX halyqaralyq teatr festıvali ótken edi. Festıvalǵa elimizden shaqyrylǵan S.Seıfýllın atyndaǵy Qaraǵandy oblystyq akademııalyq Qazaq drama teatry «Úzdik akterlik ansambl» arnaıy syılyǵyn oljalap keldi.
Sáken teatry serbterge áıgili jazýshy-dramatýrg Oralhan Bókeıdiń «Ataýkere» dramasyn alyp bardy. Muny sahnalaǵan rejısser – Aıdyn Salban.
Joakimfest XIX halyqaralyq festıvaldyń qazylar alqasy teatr ártisteriniń sheberligine tamsanyp, ony joǵary baǵalap, «Úzdik akterlik ansambl» degen syılyqpen marapattady.
Jan-jaqtan kelgen teatrlardyń ónerine teatr synshysy, teatrtanýshy, dramatýrg Aleksandr Mılosavlevıch (Serbııa), teatr rejısseri jáne Belgradtaǵy О́ner ınstıtýtynyń drama óneri fakýltetiniń oqytýshysy Ivana Výıch (Serbııa), akter jáne teatrtanýshy Mırolıýb Mııatovıch (Bosnııa, Gersogovına) sekildi óner maıtalmandary baǵa berdi.
– Basynda jazýshy-dramatýrg Oralhan Bókeıdiń tereń fılosofııalyq oıǵa qurylǵan «Ataýkere» shyǵarmasy boıynsha ınssenırovkasyn rejısser Aıdyn Salbannyń ózi jasaǵan qoıylymymyzdy serbter qalaı túsiner eken degen qobaljýdyń bolǵany ras. Degenmen, sahnanyń joǵarǵy jaq mańdaıynda serb tiline aýdarylǵan tıtr qatar berilip otyrǵanda, zalda shybynnyń yzyńy estilerdeı tynyshtyq ornady. Eki saǵat 10 mınýtqa jalǵasqan spektakl aıaqtalǵansha, eshkim ornynan qozǵalǵan joq. Qoıylym bitkende kórermenderdiń kóńil kúıi olardyń dúrkiretip qol soqqandarynan aıqyn ańǵaryldy. Ulttyq mýzykamyz, ásirese dombyranyń qońyr úni men ártisterimizdiń oıyny qatty unaǵanyn aıtty serbııalyq kórermender, – deıdi teatrdyń baspasóz qyzmetkeri Saǵat Batyrhanqyzy.
Bilýimizshe, bul teatr festıvaliniń Serbııada bedeli zor. Onyń negizi sonaý XIX ǵasyrdyń ekinshi shıreginde qalanǵan. Serbııaǵa teatr ákelgen Ioakım Výıchtyń atymen atalǵan. Festıval bastaý alǵaly beri Kragýevas qalasyna álemniń 25 memleketinen teatr ujymdary kelip, 150-ge jýyq qoıylym qoıypty.
Qaraǵandy oblysy